السلام عليكم , ان شاء الله تكونو بخير ,,

الحياة بائسة , شئ غير حقيقى بالمرة , منتهية , قاسية الى ابعد الحدود …

الحقيقة دا موش مجرد كلام , هو وصف مختصر لشئ فى منتهى السخافة , و مرحلة من كونك مخلوق بتمر بيها وصولا للأبدية ..

تجديد حياتك البائسة بيعتمد فى المقام الاول على استعدادك الداخلى للموضوع دا من الاساس , بجانب استعدادك لانك تغفر , تسامح , بالانجليزى  let it go ..

٩٠٪ من البشر فى الغالب بيقدروا يعملوا الموضوع دا , اللى بيعافر و يحاول و مبيقدرش بكل السبل , هو الشخص اللى بيفكر كتير .. او تحديدا .. الراجل اللى بتلاقيه قاعد يضحك وبس …..

مشكله النوعية اللى بتضحك كتير , او جزء منها بلاش نعمم , انها فى الغالب بتكون عباره عن عقل وبس .. ودا اسفل شئ ممكن يحصلك فى حياتك , انك تكون بتفكر ..

كونك بتفكر كتير , فأكيد هتمشى فى كذا حاجه و تحاول تفهمها , احداث , اشخاص , مجتمعك بالكامل و كل شئ محيط بيه و يخصه هيبقى تحت دراستك وانت موش عارف ولا حاسس ..

النتيجة , هتكون انك مشبع بكمية افكار سلبيه كفيلة بانها تنهى حياتك بدون سبب علمى من الاساس ,

نفسيتك هتكون صفر , و بما ان نفسيتك هتكون صفر يبقى لما صباعك يتخبط فى طرف رجل الكرسى اللى انت قاعد عليه هتلعن ” اللى عمل الكرسى , و اللى حط الكرسى فى المكان دا , و الشتاء , و اليوم اللى جيت فيه للدنيا البائسة علشان تكبر و يتخبط صباعك فى الكرسى , و رجلك اللى مفيهاش عنين , و عينيك اللى مشافتش , و السبب اللى خلاك تقوم اصلا !” ..

دا كله هيظهر فى مظهر بسيط جدا من النرفزة و كلمة “ايه القرف دا” .. بس فى الحقيقة الكلمة دى بالنسبة ليك هتكون بتعنى كل اللى مكتوب فى السطور القليلة اللى فوق ..

دا بجانب ان الشخصية اللى من النوع دا , بتكون عاملة زى كوباية مية .. شفافة , ميبانش ان فيه حاجه , و هى فى الحقيقه قاعد بتتملى , و تلاقيها بتنفجر على سبب تافه جدا !

طبعا دا تقدير المجتمع المحيط , بيكون ايه دا ! انت بتعمل دا كله علشان الموقف التافه دا ؟؟ انت انانى 😀 !!!

بس فى الحقيقه , انت بتكون انهكت ك طاقة استيعاب , علشان تستوعب كل اللى شايلة طول حياتك وصولا للموقف التافه اللى كان بمثابه حبه المية اللى ادلقت بره كوباية استيعابك ! و فى اللحظه دى انت بتحاول تفرغ جزء و لو بسيط من الكوباية دى !!

دا اقرب وصف ممكن اوصفة للموضوع ككل , وان ظهر ان المشكله فى الكوبايه خلال كلامنا ! او فى مدى استيعابها .. بس المشكله للاسف اعمق من كده ..

بالتجارب , بيبقى فى اجزاء مليانه فى الكوبايه دى اللى اتفقنا اننا هنشبها بقدره استيعابك , المهم , الاجزاء المليانه دى من بعض التجارب موش بتنفع تفضى تانى للاسف .. و كل ما بيعدى عليها الزمن , من غير معالجة , كل ما بتبقى اكتر و اقصى فى سلبيتها .. وصولا لمرحله تفقد معاها الحياة نفسها المعنى و الهدف من الاساس ..

موت اشخاص مقربين , زعل , فشل , علاقات , معاصى ! دى كلها حجات كفيلة انها ترسب جزء عمره ما يتحاش من الكوباية دى .. و للاسف .. محدش بيفهم فى يوم من الايام الا انت وبس ! مهما كانت قسوة وصفك , هتوصل للاخر لجملة بسيطه جدا “إحترت اعبر” لانك موش هتعرف توصف اى شئ من اللى حاسس بيه لاى شخص مهما كان مدى قربه منك ..

خلينا نعدى الجزئية دى , و كفاية عليها لحد كده … بس احنا فى بدايه البلوج قولنا ان انت لازم يبقى عندك استعداد داخلى , و مغفرة كافية لكل مساوئ الحياة اللى شوفتها ..

المشكله هتكون فى الجزء التانى , المغفرة الكافية …

بصراحة دى مشكلة كبيرة ,, المغفرة فى بعض الاوقات بتعنى مسامحة فى الكرامة , اوقات بيبقى معناها عمر ! و اوقات كتير معاناه جهد و تعب .. دى كلها حجات صعب جدا تسامح فيها بسهولة .. بس قريت “زىّ زيك بالظبط” ان فيه كام حاجه ممكن تحل الموضوع دا ..

  • فكرة ان الحياة موش ابدية , و انها اقل بكتير من انك تزعل او تدايق بسبب مواقف حصلت فيها
  • فكرة ان الحياة محطه لا تتعدى الدقيقة فى الابدية المنتظره
  • فكرة انك كده كده هتموت : ودى فكرة قاسية جدا جدا جدا جدا , انك متكونش موجود تانى ! موش هتتحكم فى مين يشيلوا نعشك حتى ! فكره تستحق انك تفكر فيها و توزن عليها حجات كتير من اللى مر فى حياتك.
  • تغيير الجو , اجازة طويلة او حتى قصيرة فى اى مكان على وجه الكوكب بعيدا عن كل الضغوط اللى انت فيها
  • محاولة الخروج للعالم الواقعى , و انك تعيش تجارب حياه فعلا موش جو انك لو بتضحك تكتب “هههههههههههه” !! السوشيال ميديا شئ حقير جدا والله
  • حاول تلمس كل مادة بتحبها على وجه الارض .. حاول تكون جزء منها , يمكن تفرح ..
  • ارجع تصحى بدرى و تنام بدرى و تعيش يومك فى ٩٠ مكان !
  • انطلق اكتر , و حاول تنسى اخطاء الماضى , و ركز كويس جدا ,, فى انك تعمل اخطاء جديده ! ايوه انت قريتها صح .. تعمل اخطاء جديده !!!!

النقطه الاخيرة دى كما السحر بصراحه ..

الكوباية لما اتملت اتملت بسبب اخطاء سواء لينا ايد فيها او ملناش ايد فيها .. سواء كانت تخصنا , او كانت تخص الحياة ككل ,, دا اللى دايما بيخليك موش قابل اللى جاى ايا ما كان وضعه , بس اذا وافقت انك تغلط , او بمعنى اصح , قدرت تقنع نفسك انك هتغلط تانى و هتعدى و هكذا ,, هتعرف تنطلق فعلا فى حياتك , حتى لو بشكل مخبط شويه فى البداية ..

فى حقيقة الامر , انا نفسى بحاول اعمل كده دلوقتى ,,

هياخد قد ايه الموضوع علشان يتحقق ! موش هعرف احققه اصلا ! دى كلها حجات سهل اوى تتعرف خلال ١٥ يوم من النهارده , دا اذا لينا عمر اصلا 😀

 

فى النهاية , اذا كنت تمام و زى الفل , ارمى كل كلامى دا فى اقرب سلة مهملات ,

اما اذا كنت من المعترضين على الحياة دى 😀 فحاول تجرب معايا

دمتم سالمين 🙂

More Readings,

Exploratory research is research conducted for a problem that has not been studied more clearly, intended to establish priorities, develop operational definitions and improve the final research design. Exploratory research helps determine the best re...

GOMS is a model of human performance and it can be used to improve human-computer interaction efficiency by eliminating useless or unnecessary interactions. GOMS is an abbreviation from: G → Goals O → Operators M → Methods S → Selection ...

The cognitive walkthrough is a usability evaluation method in which one or more evaluators work through a series of tasks and ask a set of questions from the perspective of the user. The focus of the cognitive walkthrough is on understanding the syst...

Experience sampling is a way to find out more about an experience while the event is actually happening. Participants stop what they are doing and take time to note their experiences over a period of days, weeks, or even years — which can result in...

Through the Brief Book, Joseph McCormack tells us about the Elusive 600 and how to use it in the aim to present great ideas in little words. We have the mental capacity to comprehend 750 words a minute but most people speak at 150 words a minute. ...

Card sorting is a method used to help design or evaluate the information architecture of a site. In a card sorting session, participants organize topics into categories that make sense to them and they may also help you label these groups. Used ...