السلام عليكم , إن شاء الله تكونوا دايما بخير 🙏

اسف على العنوان الغبى دا ! بس الموضوع فعلا ملوش عنوان إلا كده ..

كأى ديزينر , بيئة العمل الخاصة بيه بالنسبه ليه مكان مقدس جدا ! شئ لازم يكون كله صح , مينفعش اشوف اى اخطأ فيه تماما حتى لو بسيطه , بحس ان  دا هينعكس على الشغل اللى بيخرج , بس شخصيا واجهنى اخطاء كتير جدا فى تكوينى او بنائى لبيئة العمل الخاصة بيا فى كل مره كنت ببنى فيها بيئة عمل جديدة كنت بغلط بطريقه مختلفه ! ما شاء الله كرياتيفتى عاليه فى الاخطاء !

المهم من خلال كل اللى مريت بيه , اقدر انصحك بكام حاجه و انت بتفكر فى بيئة العمل الخاصة بيك , و خلونا على طول نبدء ..

الأساس سهل النقل ..

بيئة العمل بتتكون من حجات كتير جدا , جهاز , شاشات , مكتب , تابلت , مساحة للرسم و الاسكتشز , مكتبة , كرسى سهل الحركه  مريح لان دا هتقضى عليه اغلب حياتك ! و ك مكان لازم يكون فى قدامك وانت قاعد فيو – ميبقاش مقفول ب حائط , و لو دا هيحصل , يبقى بنعتمد على بعض البوسترات فى براويز – علشان تغيرها كل مده – و الاضائة كذلك و نظام صوت محترم – شئ اخضر , تهوية كويسه , دى اهم حجات بشكل عام فى اى بيئة عم ..

انت تقدر تشتغل من غير تقريبا ٩٠٪ من كل اللى مكتوب دا , ودا المقصود ب الاساس سهل النقل .. اساس بيئة العمل دايما حاول يكون سهل فى النقل من اى حته لاى حته , حط فى بالك انك ممكن يكون وراك شغل بره بيئة العمل دى لمده ٦ اشهر مثلا ! هتعمل ايه وقتها ؟

علشان كده دى حبه حجات لو اغفلتها النهارده هتندم على كده بكره :

• الجهاز – لاب توب قوى
• التابلت – له مكان فى شنطتك , سهل تنقله معاك دايما
• ادوات الاسكتش الرئيسية (القلم الرصاص – قلم جاف – مسطره – شئ يتسند عليه او حتى مفكره) لازم يكونوا خاماتهم كويسه جدا , و من نوع جيد على الاقل بحيث انه يقدر يعيش معاك فتره اكبر , و تقدر ترميه فى الشنطه وانت رايح اى حته من غير اى خوف عليه.
• النظام الصوتى اللى عندك جميل – بس لازم كمان يكون فى عندك هاند فرى او ايربودز و يستحسن تكون ويرلس

طيب ك نصايح للمكونات دى , أرشحلك ايه ؟

1. الجهاز : ماك بوك ١٥ إذا فى إمكانية – لو ويندوز شوف حاجه جيمينج زى إلين وير او ريزر بليد إذا فى إمكانية.
2. التابلت : واكوم , شئ مش صغير و مش كبير , يعنى هات شئ وسط – شخصيا بستخدم بامبو بس دى و النقطه الجاية هغيرهم ..
3. الاقلام : حاول يكون الاقلام خامتهم مش بلاستيك , يكونوا ستانلس – شخصيا الجاف parker و الرصاص rotring rapid pro
4. الصوت , من خلال تجربى الشخصية – إبعد عن بيتس , صدقنى انا مفيش شئ بيطلع صوت باظ عندى من نفسه غير بيتس. شخصيا ارشح ليك JBL او SkullCandy.

النقطه ٢ و ٣ فى شئ افضل منهم هما الاتنين , تقدر تشترى  Bamboo Folio و دا رائع جدا و ميكس بين الإتنين .

الإضاءة

انت ممكن تكره نفسك بسبب الموضوع دا , ف دى كام نصيحة كده خليهم فى بالك :

• ميكونش ليهم أى انعكاس على الشاشة , إبعد مكان الشاشة تماما انعكاس الإضاءة بأى شكل بقى و اسهل طريقة إنك تخلى الإضاءة متوجهة على الحوائط نفسها – تقدر تستخدم إسبوتات من ايكيا للموضوع دا علشان تبسطه.
• قسم الإضاءة على ٣ مفاتيح دايما .. فى اوقات هتبقى محتاج الاضاءه ضعيفة , محتاجها متوسطه , محتاجها قويه , حسب حالتك النفسية فى الوقت دا , ف احسن شئ , إنك تكون مقسم عدد الاسبوتات مثلا على ٣ مفاتيح , يعنى لو عندك ٦ إسبوتات , يبقى كل مفتاح بيتحكم فى ٢ منهم ..
• بلاش الوان فى الاضاءة – انا بحب الالوان جدا فى الاضاءه , بس لو هتعمل كده , يبقى ابعد عن الاضاءة الاساسية اللى فى السقف , و خلى الاضاءة الالوان فى الارضيه , او مستواها منخفض و متوجهة ناحيه الارض , هتعيش الجو , بس هتفضل شايف كل شئ صح قدامك.
• انت محتاج تشوف الشمس – لكن مش محتاج تشوف الشمس على جهازك , خلى الشمس قدامك اكتر وقت ممكن او استخدم تظليل و يا سلام لو ينفع تحوش التظليل و تركبه وقت ما انت عاوز او ستاير تكون مش بتحجب الاضاءة بالكامل يعنى.

منين بيتحكموا فى الشئ دا ؟

لو تقدر تخلى كل الكلام دا , التحكم فيه بالكامل قريب من المكتب , او جزء من المكتب نفسه ! يبقى كويس جدا , زمان فى مره كنت عامل كده , عادى اى نجار ممكن يحفرلك المكتب و تجيب حجات شكلها شيك كده تليق مع المكتب “دا لو انت اللى عامل المكتب مخصوص مش جايبه جاهز” و اسلاكك و ظبط الدنيا بنفسك لو ليك فى الكهربا – او هات حد متخصص بس بعد ما تكون راسم الشكل فى مخيلتك , و الموضوع هيبقى لطيف و مش مكلف ابدا على فكره.

اختار الشاشة الصح

مبدئيا لو ماك , انت لازم يكون فى شاشة مش من ابل , ولازم تشوف شغلك شكله ايه على الشاشات التانيه علشان متتصدمش اوى يعنى فى الاوت بوت النهائى.

شخصيا بفضل يكون فى ٣ شاشات , حاجه كبيره اساسية ,و شاشتين صغيرين –  ممكن شاشة اللاب توب و شاشه تانيه صغيره مش كبيرة, و ممكن يبقوا شاشتين صغيرين و شاشة كبيرة اساسية و تقفل اللاب خالص يكون افضل برده.

بصراحه فى كمية شاشات رهيبة , بس نصيحة تشوف كتير ريفيوهات لاى شاشة هتشتريها , و خلال ما انت بتتفرج على ريفيوهات , هتكتشف انت عاوز اى تحديدا و هتعرف تبحث ازاى و تختار ازاى. و الفيديو الجاى دا ممكن يغيرلك طريقة تفكيرك فى الشاشات نهائيا

الصوت

الصوت هنا مقصدش الحل اللى هتستخدمه لو انت خارج ك سماعه , او حتى لو انت فى الاستوديو و عاوز يكون ليك خصوصية فى وقت ما فى اللى  بتسمعه.  بس بتكلم هنا عن السماعات المعتاد و ال subwoofers – studio monitors دا إذا فى إمكانية للاخيرة طبعا ..

الصوت بشكل عام بيختلف احتياجك ليه , حسب اللى بتسمعه فى المعتاد – بس لو ناخد مثلا سماعات الاستديوهات الصوتيه – و نعتبرها ان دى اعلى جوده بشاهدة صناع الموسيقى نفسهم – يبقى الافضل اننا نجيب سماعة بتخرج كل تفاصيل الصوت بشكل نقى جدا , و مش بتغفل بسهولة اى صوت آلة مثلا فى ال background لاى مقطوعة ..

التراب ؟ العدو الأول

خلينا متفقين ان التراب دا اكتر شئ بيجهدك فى محاربتة – مهما تكون عامل شكل جميل قاعد فيه , هتلاقى ان ب مجرد التراب ما اتكون و خصوصا التراب الناعم دا – على الورك ستيشن و المكتب و الارفف , انت هتقرف من المكان بالكامل وقتها , و هتتعب فى حربك دى جدا

الافضل ان من البداية تكون مقفل المكان كويس – و المناطق اللى هتكون فى اوقات فاتحها من الشبابيك تكون متظبط عليها اى فلتر و لو بسيط جدا , هيفيد كتير جدا فى تقليل التراب على الاقل.

الخشب و الحجاره و حبة فن

استديو ؟ خلى الارضية باركيه – خشب – خلى الحيطان حواليك و الارفف كلها عباره عن خشب و حجارة “طوب” – فى انواع كتير بس المقصود من الاخشاب و الحجاره النوعية اللى فى الصور دى

الحجر اللى فوق صعب يتكون عليه طبقه تراب تغير كتير من شكله , او تظهر بسهوله عليه + الخشب , من النوع اللى اصلا تحس انه بيشفط التراب جواه ! صعب تحسب ان اللى قدامك دا عليه تراب او لا

الالوان هادية , التدرجات و الاختلافات فى الالوان بين الاحجار و حتى على طول الالواح و الاماكن الخشب  انسيابية – انت محتاج يكون كل شئ حواليك هادى و لو مجنون يبقى مجنون بعقل !

فكرة انك تعمل حيطه معينه وسط الكلام دا و تخليها مودرن فى نظام الوانها , فكره برده كويسه جدا لو اتنفذت صح

تنفيذ شئ بالشكل دا و بطريقة احترافيه لدرجه انه يقنعك انك وسط بيت قديم فى لندن و بتشتغل هيبقى شئ مرهق جدا ليك مع الحرفيين فى مصر و اى مكان عربى للاسف .. ف تفضل موجود ٢٤ ساعه لحد ما تطلع اللى فعلا ميحسسكش لوهلة ان دا فى مصر.

اللوحات , او اى شئ فنى هتضيفه ك ديكور للمكان , لازم يكون فيه رساله مباشرة ليك شخصيا , حاجه عاوز تخليها جواك و تفكر نفسك بيها كل شويه و تكون قادرة انها تخلى الشغف جواك يزيد او على الاقل يفضل موجود بأى شئ انت بتعمله, اختار اكتر من رساله عاوز تقولهم لنفسك كل شويه , و اختارلهم لوحات .. و كل فترة , تقدر تغير حسب الوضع اللى انت فيه.

لو فى إمكانية , انك تجيب شاشة كبيره ٥٠ اينش مثلا او حاجه من دى , و لو هتعمل fun area صغيرة كده عباره عن رف ل playstation و الشاشة دى , تقدر تخلى الشاشة متوصله برده بجهازك و تعرض عليها كل يوم شئ مختلف حسب يومك , او حتى تخلى عليها slide show لصور معينه .

مكتبتى الصغيرة

هديك حبة نوتس كده حطهم فى دماغك كويس و خلاص :

1. فى فرق كبير من ارفف مقتنيات – و ارفف كتب , دا غير دا تماما
2. رف الكتاب اقل عرض ينفع ليك هيكون 20 سنتى , و يستحسن يبقى اكبر
3. حاول تخلى ارفف الكتب ليهم حماية من الاجناب علشان متتروق من تراب الهوا فى كل حته
4. لو تقدر تعمل مكتبة صغيره جوه الحائط نفسه و يكون ليها زى باب كده زجاج مبين كل حاجه جواها , يكون احسن بكتير
5. اللى يفيد وبس – محتوى المكتبه دى لازم تبقى بتنتقيه بطريقه حذرة جدا – بشكل عام قرايتك المفروض تكون فى شئ يفيدك و يعملك مهارة للعمل جديده – فى مكتبتك الموضوع برده كده , بس بجدية أكبر من كده , مكتبتك دى اللى هتحدد بكره بتاعك شكله ايه ..

مش مجرد كرسى

خلينا متفقين انه مش مجرد كرسى , انت بتقضى مثلا ٨ ساعات على الاقل كل يوم قاعد على الشئ دا ! ف دا بالنسبه ليك المفروض يكون اكتر حاجه مريحه, علشان على الاقل متزهقش + ان تعب الضهر و العظام اللى بيكون بسبب الجلوس الكتير انت فى غنى عنه.

متستخسرش فى الكرسى اللى هتجيبه , يعنى اللى هتستخسرهم هتصرفهم اضعاف مضاعفه مع اول دروب هيحصل معاك فى الضهر و المشكله الاكبر انك هتفضل تعانى من بعدها الى ان يشاء الله. اى حاجة فى الضهر مش بتخلص , تعبت مره بسبب ضهرك , هيفضل يجيلك كل كام شهر طول عمرك, ف خلينا نحترم نفسنا كده من اولها 😂

بما انك فى الغالب هتكون UXr ف خليك ملك كده و طبق افضل جملة عن ال UX فى اختيارك للكرسى ..

Durability , Usability & Beauty !

اختار شئ قوى يستحمل , لازم يكون الكرسى مريح ليك , يكون فى دعامة للضهر – منطقة القطنية و الإنحناء اللى فيها دا تحديدا – يكون مساند الايد مظبوطه و تقدر تتحكم فيها على الاقل ك إتجاه او علو – مسند الرقبة و الرأس لازم يكون مريح و تقدر تعدله برده او تغير وضعيته

بس يا سيدى , دا كل اللى اقدر افيدك بيه او اللى افتكرته ف كتبته ..

لو محتاج اى حاجه تانى تقدر تضيف كومنت و نتناقش او اى طريقه تانيه للتواصل

اشوفكم على خير , دمتم سالمين 🙏