الكتاب دا اكتر حاجه شدتنى ليه اسمه .. كتاب ل austin kleon , الكتاب بصراحه رائع .. انصحك تقرأه  , و متاخدش الكلام اللى فيه على صدرك اوى يعنى , لانه فى بعض الاجزاء صريح زياده عن اللزوم 😀

الكتاب موش كبير , هو ١٠ نقط .. تقدر تعتبر كل واحده فيهم مقال كبير شويه .. هو موش بيتكلم عن السرقه .. بالعكس .. الكتاب بسطلك جدا منطقه فى الغالب الناس بتشوفها صعبه شويه , و هى الاستلهام ..

فى فرق صغير ما بين الاستلهام و السرق .. و الكتاب اختصرها فى كون المستلهم فنان .. وان اختلفت طريقه طرح الكتاب للفكره دى .. بس من خلال الطرق اللى بيقدمهالك و النصايح اللى بتشوفها فى الكتاب .. هتلاقى انه فعلا بيتكلم عن ازاى تبدع من خلال ابداع الاخرين .. موش نسخ ولصق !

الكتاب بعتبره من افضل الكتب اللى قريتها فى المجال بشكل عام .. و فى حجات كتير جدا عجبتنى فيه سواء لفكرتها او لطريقه طرحها .. دا تضيف عليه انى زى اى مصمم بيشترى الحاجه اللى يعجبه شكلها حتى لو موش مهتم باللى جواها 😀

فى بدايه الكتاب .. بيتكلم عن ازاى تنظر للعالم كفنان .. بيقول ان الفنان الحقيقى اذا اتسأل ازاى بتحصل على افكارك هيكون جوابه .. انا بسرقهم 😀 , فكر فى ان كل حاجه حواليك موش شئ حلو و شئ سئ .. كل حاجه حواليك هى حجات تستحق السرقه ! و حجات متستحقش السرقه .. ادرس و اتمعن فى الحجات اللى تستاهل السرقه ..

nothing is original

لا شئ أصلى Nothing is Original

بصراحه عنوان بيختصر حجات كتير جدا .. اى مبدع . هيكون من اعماق نفسه عارف ان الجمله دى هى الحقيقه الثابته الوحيده فى الكون كله .. ان مفيش انتاج بشرى اصلى .. ولا هيتوجد! اللى بيشوف غير كده , خصوصا لو فى شغله .. هو واحد واخد فى نفسه مقلب و بلونه كبيره اوى اوى اوى 😀 ..

الكتاب فى النقطه دى بيتكلم عن ان كل حاجه بتصنعها . هى فى الاساس مبنيه على اللى اتصنع قبلها .. اى حاجه .. الجزئيه دى كفيله انها تخلى انه لا شئ اصلى .. بس الموضوع لاكتر من كده .. انت شخص من وسط مليارات م البشر .. الفكره اللى انت بتفكر فيها . الفكره المجنونه دى .. فى الحقيقه اتوجدت من قبل ما انت ما تتولد “ولو على سبيل الهزار .. فى حد فكر فيها قبلك” , فى الحقيقه احنا جداد جدا على الحياه و على الكون كله .. خصوصا اخر ٢٠ سنه من عمر الكوكب دا ! بقى اللى بيحصل فى يوم واحد .. صعب جدا يتم تداركه فى اليوم اللى بعده ..

1-1-3

١+١=٣

the genealogy of idea او إنساب الفكره .. اى فكره جديده هى عباره عن ميكس ما بين فكرتين , تلاته , اربعه , عشرين فكره قديمه .. فى الجزئية دى هو بيعتبر الفكره طفل .. و بيحاول يخليك تختار عائلته كويس , خلى دايما الفكره ليها عائلة من فنانين محترمين .. ليهم تقلهم .. هتلاقى الفكره اللى هتخرج بيها ليها تقلها . من الاخر . متشوفش غير الحاجه النضيفه .. ولا تفكر غير فى الحاجه فعلا المبدعه .. نقى نفسك خليك دايما محاط بأفكار و اعمال محترمه علشان تعرف تطلع بحاجه محترمه اصلا .. العالم المحيط بيك .. هو اساس الفكره .. و هنا موش بيقول انك تروح فرنسا يعنى و تقعد فى اللوفر علشان تبقى فنان ..

الموضوع ايامنا ابسط .. عندك مواقع السوشيال للمجال كتير جدا , كلها فيها اغلب الفنانين اللى انت بتحترمهم , دريبل , بيهانس , مواقع الجوائز و المواقع الشخصيه , كتير جدا .. تابع الناس دى ..

art

تسلق شجرة عائلتك

فى الجزء دا , بيتكلم عن فكره رائعه. انت معجب , بل مهووس بفنانيين تانيين ؟ اكيد , اى حد فينا له ناس بيعتبرهم عباقرة ..

كون لنفسك عيلة من العباقرة دول .. و ابدء ادرس كل شخص فيهم كويس جدا .. بل .. حاول تدرس ملهمين العباقرة دول .. متكتفيش بيهم هما نفسهم .. حاول توصل لاى مصدر هما اعتمدوا عليه علشان يبقوا كده.

خلي العالم حوليك كله بينطق باعمال الناس دى .. الطريقه دى موش حل سحرى .. لكنه حل جذرى .. هيغير بالكامل طريقه تفكيرك . و هينقلك لمستوى انت غير مدركه اصلا دلوقتى .. ودى خصوصا عن تجربه.

اعرف ايه القوانين , الاهداف اللى بيحاول يوصلها كل واحد منهم .. اعمل حاجه تتماشى مع قوانينهم .. ادخل عالمهم و بقوه .. اقتحمه .. و متخليش هدفك انك تبقى زيهم .. خلى هدفك انك تكمل الخطوه اللى بعدهم , على الاقل .. تبقى احسن منهم 🙂

schoolyourself

علم نفسك

اكبر خدعه عملها الشيطان فى البنى ادم .. انه فهمه ان هتيجى اللحظه التاريخيه اللى يقعد عباقره الكون كله يشربوه العلم بالمعلقه ! طبعا انت بتقرأ الكلام دا وانت بتضحك على اللى بيتخيل كده !؟ صح ؟؟

سؤال رفيع .. انت نفسك , فى كام حاجه نفسك تتعلمها و لسه متعلمتهاش ؟؟ لو الاجابه بتحتوى على اى كلام غير “مفيش ولا حاجه” .. يبقى انت موش من الناس دى .. لو فى .. و مبدأتش فيها .. يبقى انت منهم , قوم اضحكلى على نفسك و عليا بالمره علشان انا زيك كده برده فى بعض الحجات ..

انت لازم ديما تدرس .. الفن .. وان كنت بتشوفه ابداع .. فعلشان يكتمل و يبقى فعلا فن ناضج .. لازم يبقى مقنن .. الدراسه و المعرفه , بتختصر عليك تجارب فاشلة كتير .. يمكن بتخليك تدخل فى تجارب فاشله تانيه 🙂 بس التجارب الفاشلة اللى معاها علم .. مفيده اكتر بكتير جدا من التجارب الفاشلة لواحد اعمى !

التعليم فى زمنا دا .. اصبح كلمتين .. Google it .. اى حاجه عاوز تتعلمها , اسأل الخال جوجل .. موش هيبخل عليك بحاجه !

collect creative ideas

جمع مسروقاتك لما بعد

جزء رائع صراحه .. و موجوده فى مواقع كتير بتدخلها حاليا .. الفكره باختصار , انك سواء الحاجه اللى بتعجبك مفيده و هتشتغل بيها دلوقتى او لا .. حافظ عليها لما بعد .. باى طريقه , موقع زى pinterest.com وان كنت من حوالى سنه مثلا بشوفه تافه .. الا انى فى الفتره الاخيره بقيت معتبره فكره اسطوريه .. استخدمه ! استخدم ال bookmarkes عندك فى المتصفح .. المهم انك تحافظ على كل حاجه فيها ابداع شوفتها , كل فكره عجبتك .. لان هيجى وقت و هتحتاج الفكره دى .. المهم انك ترتب الحجات اللى تعجبك كويس علشان متوهش فيها بعدين ..

 

النقط اللى كتبتها دى , و زياده عليها كمان .. كله كانت من اول جزء فى الكتاب كله , بنصحك و بشده كمان تقرأ الكتاب دا و بتمعن “معرف الكلمه دى طلعت وسط البوست دا ازاى بس قشطه” .. المهم .. الكتاب فعلا مفيد و متفوتش على نفسك فرصه انك تقراه , و لو هتفوتها على نفسك .. فانا هكتم على نفسك بأذن الله , و من وقت للتانى هكتب بوست بيختصر جزء من الكتاب ..

 

دمتم سالمين 🙂

More Readings,

Wizard of Oz prototyping. Wizard of Oz prototyping (WOZ prototyping) is a design methodology used in rapid product development to improve the user experience (UX). WOZ prototyping requires developers to create a rudimentary model of the completed pro...

The sketch file is fully layered and editable, you are free to use this file in whatever you want, and you have the full freedom to change, remove, edit any part of it.   Download for free! Download Sketch file #thecontent i...

The Elito method was the first analysis method we used, and it is basically based on brute force thinking. The nature of this method is definitely data analysis since you use it to analyze data. The context that you will use this method is if you ...

Exploratory research is research conducted for a problem that has not been studied more clearly, intended to establish priorities, develop operational definitions and improve the final research design. Exploratory research helps determine the best re...

The visible clustering of observations and insights into meaningful categories and relationships • Designers capture research insights, observations, concerns, or requirements on individual sticky notes. • Rather than grouping notes into predef...

Design ethnography is ethnographic qualitative research set within a design context. It delivers results that inform and inspire design processes, for instance service design processes. It offers reference material about people's everyday life; thei...