دوشة حروف

بيقولوا اهلا بالعالم ؟ طب اهلا بالكون كله !

   -   354

موش هتلاقى محتوى قيم هنا .. غير انه يعتبر دستور “اه دستور” دكتاتورى للمدونه ! بما انها ملك خالص لى .. فقررت انى اعين عليها ملك واعمل قوانين و حجات غريبه و مقولهاش لحد .. علشان اى حاجه تحصل متعجبنيش .. اقول قدام انها بتخالف القوانين اللى حطيتها ! ذكى و حويط و كده !

نتكلم بجد ..

من فتره .. موش قليلة , خالص .. حوالى سنتين و نص , او تلاته ! ونص 😀 ! الله اعلم ,

كان عندى بلوج صغيره , فيها عربى .. لحد ما قررت انى اكتب فى البلوج بالانجليش وغيرت الويب سايت بالكامل ك تصميم الخ الخ الخ .. بعدين وقفت البلوج , بعدين جت شغلتها , و وقفتها و شغلتها وهكذا لحد ما جت فتره حاسمه .. من حوالى ٦ شهور تقريبا ..

قررت ان مفيش لزمه انى ادوب نفسى و اعمل شو كيس لبروجيكت ! طالاما هو كده كده بعرضه على دريبل ..

و مفيش لزمه برده انى اعرض شغلى فى مكان غير واحد بس .. تركيز اكتر !

و مفيش لزمه لبلوج انجليزى .. طالاما انا عاوز افيد عرب !

و مفيش لزمه لانى اعمل بلوج عربى ! 😀

حوش السطر الاخير دا .. لسه موش هكتبه دلوقتى يمكن سنتين تلاته اقول كده لو كان لينا عمر 😀

على اى حال .. شوفت ان الاهتمام الاحسن ميكونش بتعقيد الامور , فى حاجه , كده كده موش هتبقى افادتها ضخمه يعنى ! لا انا اقتصر السايت الخاص بيا , على index يبقى فيها تواصل , و رابط دريبل , و كلمتين عنى و السى فى ..

و اخلى المكان اللى فعلا يكون فيه اهتمام بيه . المدونه ..

و علشان مبقاش ملاك م السما , مضحيتش ! بصراحه مفيش حاجه اصلا يتضحى بيها 😀 و بالنسبه للمدونه انى  عاملها علشان فى حد هيستفيد و موش عارف ايه و الجو الديق دا !!!.. انت هتستفيد .. اه بأذن الله و افاده كبيره , بس دا من اهدافى .. يعنى مفيش ادنى تضحيه  برده .. انت بتستفيد معلومه .. انا بستفيد انى وصلتلك المعلومه و حققت هدفى .. 😀

المحتوى فى المدونه هيبقى بشكل عام ٩٠٪ عن المجال , يعنى موش هتلاقى حاجه بره المجال الخاص بالتصميم و التطوير الا نادرا .. و لو لقيت حاجه من دى دا هيبقى معناه انى اما مخنوق جدا .. او مبسوط جدا !

الحجات اللى ناوى اهتم بيها جدا جدا جدا فى المدونه هتكون ان شاء الله

تجربه المستخدم !

تصميم واجهة الاستخدام ..

تكويد و تطوير

تطوير وردبريس

مقالات عن حجات فى المجال نفسه

و اخيرا .. دوشة حروف ..

اكيد لو عملت بروجيكت ملوش اى تلاتين لزمه فى الحياه هتكلم عنه كأنى عملت مركبه فضائيه هتطلع القمر بعد ساعتين و من القمر هتطلع على رمسيس تركب ميكروباس اسكندريه من تحت الكبرى !

دا موش تريقه ولا تقليل من قيمه اى بروجيكت بعمله .. كلنا بنبقى شايفين شغلنا كده 😀

المهم .. ان شاء الله مكونش تقيل عليكم .. و لو تقيل .. و موش طايق تقرا .. ولا تشوف فيديو .. ولا اى حاجه  .. انت مكمل قرايه ليه ؟؟ ها !!!

و ياريت محدش يقولى استخدام اللغه العربيه الفصحى لإثراء المحتوى العربى !

انا مروحتش بعت مكتوب ! و المحتوى العربى وان كان يمثل مشكله , فمدونتى موش الحل ! خالص ! و لو الحل .. برده العامية المصريه .. من ضمن العربى 😀

خلاص كده ..

رشينا مية و فتحنا باب المصلحة ..

استنو كمان كام يوم ان شاء الله فى حاجه هتعجبكم جدا <3

اشوفكم على خير 🙂

دمتم سالمين <3

المناقشة و النشر