تصميم واجهة الإستخدام

10 نصائح .. لتصميم واجهة إستخدام ناجحة [UI]

   -   1506

السلام عليكم .. إن شاء الله بخير 🙂

جمال الشكل اللى قدامنا بيساعد كتير جدا على قرارات مصيريه ! موش تفاهة .. بس دى غريزه فى الانسان نفسه! علشان كده لازم تستغلها صح .. فى تصميمك لاى واجهة استخدام ..

الاول .. ك UI Designer. موش معناه انك ميح UX .. لازم على الاقل يبقى عندك معرفه كويسه , بتساعد كتير انك تكون جزء كويس فى فريق عملك ..

البوست دا نشرته قبل كده , كان على البلوج الانجليش .. هنتكلم بشكل سريع عن : ” unity , emphasis , grid systems , white space , typography, critique / test , shape / icons , usability , colors , problem solving” .. نبدأ فى الموضوع على طول ..

solve problem

١. التصميم حل لمشكلة

التصميم , حل مشكله .. وانت بالبلدى كده “حلال مشاكل” ! واجهة الاستخدام مشكله .. و لو انت موش شايف اى بروجيكت فى ايدك بالشكل دا , فى الغالب هتشتغل فيه غلط.

المشكله اللى بتواجهك , و اللى عليك انك تحلها بشكل رائع فى تصميم واجهة الاستخدام كتير , منها :

  1. هى الالوان .. هتختار انهى لون ؟؟ ليه موش لون تانى ! ايه علاقته بالبراند ؟؟ ازاى اخلى الواجهة فيها حياة اكتر ! ايه العلاقه بينه وبين المستخدمين !
  2. الخط .. ليه دا ؟ ليه ميكونش خط تانى ؟ هل هيبقى واضح على كل الاجهزة ؟ لايق مع البراند !؟ هو فيه اصلا خط للبراند ؟؟
  3. فين البروجيكت ؟؟ فين الاختلاف !؟ ايه الجديد فى البروجيكت دا ؟؟

إن كان مجال ال UX هو مجال تفكير و و و وو و , فبالنسبه ليا , بشوف ال UI مجال صعب , موش حاجه سهله , لو عاوز تشتغل فيه صح ..

سبب الصعوبه فى تصميم واجهه الاستخدام .. هو اختلاف كل مشروع عن التانى .. انت مينفعش تشتغل ١٠ مشاريع كلهم شبه بعض .. ولا حتى ٢ ! لازم تعامل كل بروجيكت عندك ك masterpiece لازم تعمل كل بروجيكت فعلا له روحه الخاصه , له رونقه .. شكله المختلف .. كل حاجه لازم تبان فيها لمسه من روح البروجيكت نفسه ..

ان البروجيكت كده كده هيبقى فى الاخر متأثر بروحك ك مصمم .. بس تأثره دا مينفعش يزيد عن مثلا ٢٠٪ .. زاد عن كده .. انت بتقلد نفسك , ودى حاجه اوحش من انك تقلد غيرك, لانك مكانك ! موش هتطور ابدا.

خد بالك من النقطه دى . مينفعش تقع فيها. ابدا!

usability

٢. إمكانية الإستخدام

عارف انا الجماعه بتوع انا UXr مليش فيه , وانا UID مليش فيه ! الجماعه دول تقريبا كده , هما اللى كانو بيشاوروا على كل الفصل لما المدرس يقولهم انتوا ليه غلطتوا ! سيبك منهم .. و متشتغلش معاهم.

تقول الاسطوره .. اعرف حاجه عن كل حاجه . و كل حاجه عن حاجه .. لازم يبقى عندك المعرفه اللى تأهلك انك تستلم من اللى قبلك .. و المعرفة اللى تأهلك لانك تسلم اللى بعدك .. انت بتستلم من UXR طلع عينه , علشان تعمل UID مناسب كويس و مناسب لل UX اللى اتعمل .. و هتسلم حد بعدك يسلايس او يساعد ال Front-End .. انت مينفعش تبقى اهبل لدرجه انك لا تعرف دا عاوز يستلم منك ايه وليه .. ولا اللى قبلك هيسلمك ايه وليه و مستنى منك نتيجة شكلها ايه ! أطرش فى زفة كده !

موش بقولك تعرف مهنه كل واحد و تتقنها , ولا تبقى فريق بذاتك .. بس على الاقل .. تبقى فاهم خطوات العمل كويس ايه , علشان متبقاش حلقة مفقوده فى وسط التيم ورك ..

ممكن تشوف موقع goodui.org هيديك معلومات سريعه و سهله ..

colors

٣. الألوان

بعشق الجزئية دى .. و فى الغالب لما باجى اشتغل على بروجيكت ك UI النقطه دى من اكتر النقط اللى بتاخد معايا وقت كبير لحد ما استقر تماما فيها ..

الالوان هى النقطه الاولى .. الانطلاقه .. اختيارك لالوان غلط , هيخرج معاك بروجيكت كامل غلط .. ركز جدا فى النقطه دى .. انت لازم تختار افضل الوان يخرج بيها المشروع دا .. موش مجرد الوان حلوه , لا , افضل الوان للمشروع دا بالخصوص ..

بالنسبه للبراند اللى بتكون بالفعل موجوده و شغال او لما بتشتغل revamp الموضوع بيبقى سهل لان عندك اللون الرئيسيى .

اما بالنسبه للبروجيكت الجديد خالص .. دا بتبقى هنا مشكله , لو مفيش براند .. اللون الرئيسي , هو اللى يعتبر المفتاح لاى لون ثانوى بعده .. ودا اللى هتتعب فيه.

ازاى بتختار الوان ؟

فى كذا طريقه لاختيارك للالوان . هعرض الطريقه اللى فى الغالب انا بمشى بيها فى شغلى , وان شاء الله تفيدك 🙂

لازم تقسم الالوان الاول بشكل عام اللى هتشتغل بيها فى البروجيكت لنوعين من الالوان :

  1. لون رئيسيى – brand color – او لون البراند ..
  2. ألون ثانوية – secondary color ..
  3. الوان محايدة – مساعدة – neutral colors ..

اللون الرئيسيى :

دا لون البراند .. دا اللون اللى المفروض يطبع فى ذاكره المستخدم بالتصميم .. لما تشوف الموف و الاورنج بتفتكر فيدكس .. الاحمر .. فودافون و كولا و ارامكس .. الاورنج لوحده موبينيل , الاخضر اتصالات , الخ الخ الخ

لازم يكون فى علاقه بين اللون دا , و فكره و موضوع البروجيكت .. موش اى لون حلو ينفع لاى بروجيكت .. افهم كويس جمهور البروجيكت دا .. الالوان اللى متعودين عليها .. ايه اللى موش متعودين يشوفوه .. الالوان المتوقعه … هتستخدم منها حاجه ؟ لا !؟ طيب هتستخدم ايه ؟ و لو هتستخدم لون متوقع .. ازاى تخلى درجته تحسس المستخدم فعلا انه مختلف .. من غير ما تفصله !؟ اهتم بالنقط دى و اللى جايه :

  • اعرف كويس جدا المنافسين ..
  • لون خاطف للعين !؟ موش دايما مفيد ..
  • خليه لون فريد .. و لو مفيش فريد خليه أسمهان 😀 😀
  • كل لون له معنى .. روح .. شخصية !
  • لون لازم يتقرأ كويس على خلفية بيضه او سودة ..

الالوان الثانوية :

دى الوان ممكن تبقى بتساعد البراند , او جزء منها .. ممكن تبقى كلها عباره عن الوان رسايل .. ممكن متبقاش موجوده .. ممكن تبقى مختزله فى لون واحد رئيسيى , و يكون فى عندك لونين للبراند .. ممكن حجات كتير جدا .. بس برده .. كتره الالوان موش دايما بتخدم .. فحاول تخلى الموضوع نسبة و تناسب .. على حسب فعلا احتياج البروجيكت لكده , بلاش فرح بنت العمدة فى التصميم ..

الالوان المحايدة :

دول عبارة عن مجموعه الوان , بتستخدمها فى الخلفيات لل components بشكل عام فى الموقع , الخطوط و التيبوغرافى , الخ .. تقدر تقول انك كأساس .. انت محتا لونين ..

  • لون فاتح .. قريب للابيض .. و درجه غامقة منه ..
  • لون غامق . قريب للاسود . ودرجه اغمق او افتح منه ..

بشكل عام فى الالوان , علشان دى قصتها طويلة شويه .. لازم تهتم بشكل كبير جدا بكل تفاصيل الالوان اللى بتختارها و خصائصها , لازم تكون فى علاقه مابين كل الالوان فى السايت . و يكون فيه اختلاف , خلى التناسك فى موقعك “سهل” بس “ممتنع” .. اهتم جدا بال “Hue, Tint, Shade, Tone, Saturation” واى خاصية لالوانك .. و اصنع بينهم تناغم .. لازم.

shape

٤. الأشكال و الرموز

لما تتكلم عن الاشكال و الرموز , انت فى الحقيقه بتتكلم عن كل بيكسل فى البروجيكت , كل حاجه بمعنى الكلمه .. كل باك جروند ل components , اى حاجه كيرفات فى الموقع حتى لو كيرف ال container ! حتى لو كيرفات الخطوط نفسها ! لانها فى الاخر shape او شكل ..

لازم ال guidelines اللى انت فرضتها على نفسك فى ال UI تكون كلها متجانسة تماما .. كيرفات الخطوط .. و ال edges بتاعتها مناسبه جدا لنظيرتها فى الرموز و ال components ككل ..

لازم ال icons تكون فى وحده بينها و بين ال shapes و بينها وبين نفسها كمان .. علشان كده فى النقطه دى , انا بفضل انى استخدم مجموعه واحده .. و علشان تكون مختلفه , موش مهروسه فى الف فيلم قديم قبل كده , بلاش تشتغل بحاجه free ..

فى حاجه بس .. فى نقطه الالوان و الاشكال و الحجات الكتيره دى .. engagement او الارتباط و المشاركه .. انت بتبقى عارف كويس المستخدم اللى موجه ليه المنتج دا .. حاول تلعب بيه عن طريق ذكرياته او اسلوب حياته المتوقع .. يعنى مثال واضح .. زر ارسال رساله اللى اعتمد عليه جوجل .. على شكل طياره ورق ! شوفت انتشر بعدها ازاى بسرعه ؟؟ لانه اعتمد على حاجه من قلب شخصيه المستخدم .. الموضوع دا روعه .. هيسهل عليك فى حجات كتير .. حاول تستغله فى كل حاجه زى الالوان و الاشكال و حتى الخطوط .. انت ممكن اصلا , تعمل شخصيه لو الموضوع محتاج يعنى كارتونيه و تستخدمها و تبدأ تعمل بينها وبين المستخدم علاقه اهتمام .. مثال من مجال تانى .. شخصيه تودو ! انا بعتبرها اجمد طريقه اعلانات حصلت فى مصر طول الفتره اللى فاتت .. اقوى شخصيه فعليا .. تخيل انك ممكن تعمل حاجه زى كده بالنسبه لابليكيشن او ويب سايت ؟؟ متقدرش ؟؟ هوست جاتور عملت قبلك كده .. هى اينعم مخدتش الكاركتر دا للخطوه اللى المفروض يروح ليها .. بس على الاقل استخدموه .. وبقى مرتبط بيهم جدا .. وبالنسبه لاى مستخدم .. بيعرف هوست جاتور منه ..

typography

٥. التيبوغرافى typography

فى اى جزئيه من اللى فاتو .. و اللى جايين .. لازم دايما تعمل لنفسك قانون و تمشى بيه .. لازم يكون فى ثوابت انت مجبر عليها فى كل بروجيكت .. اعمل ال guidelines الخاصة بكل بروجيكت بنفسك. بالنسبه ليا انا بحب يكون كله محسوب بنسب معينه , مثلا الضعف ما بين كل حاجه وحاجه , او انها تبقى بالنسبه الذهبيه .. كحاجه متجربه وافضل ..

فى التيبوغرافى المهم بالنسبه ليك , ان الخطوط تبقى قرايتها سهله , و يكون كل نوع سواء هيدلاين او ايا ما كان فى البروجيكت واخد وزنه صح .. مالك جزء من الصفحه على قد اهميته .. تقدر تقسم التيبوغرافى فى اى بروجيكت ليك بالطريقه دى ..

  1. عناوين رئيسيه : دى بحر اهتمام .. ممكن بتبديل الخط , اكيد بحجمه , ممكن اللون , ممكن الكل مع بعض .. المهم يكون ظاهر جدا , و متبالغش فى الحجم!
  2. عناوين فرعيه : دى تقسيمات تحت العنوان الرئيسىي .. برده بتميزها , بس المهم ان حجمها و مدى تمييزها يكون اقل من الهيدلاين الرئيسيى ..
  3. معلومات فرعيه : دى بتبقى زى التاريخ , القسم , الحجات دى و فى مناطق بشكل عام . بيبقى فيها معلومات ممكن تكون مهمه , لكن فى الاهم منها بكتير , او موش مهمه لكل الناس , فدى بتخليها فى الحجم و الوزن فى الصفحه , ممكن زى المحتوى .. لكن بفضل انها تكون مختلفه على الاقل فى اللون عن المحتوى , علشان تبقى برده ظاهره ..
  4. معلومات اساسية : دى معلومات بتبقى اهم حاجه يعتبر فى الصفحه , مثال يوضح الفكره اكتر , موقع عرض منتجات للبيع .. مفيش عندك اهم من السعر بعد العنوان ! تقدر تميزه بالخط , اللون , الحجم , الخلفيه , ايقونه معبره , حجات وطرق كتير ..
  5. المحتوى : دا المحتوى العادى اللى معاك .. او مواصفات الخط الاساسى .. حاول يبقى سهل فى القرايه زى ما قولنا . يبقى فى contrast عالى بينه وبين الباك جروند فى اللون و يبقى واضح.

فى الويب .. متغفلش عن الريسبونسيف فى الخطوط . و اختصارا للوقت . تقدر تشوف المقالات دى :

و علشان انا بعشق فكره النسبه الذهبيه , و ان كل حاجه تبقى محسوبه بالبيكسل .. مفيش حاجه متسابه كده ! ولا محطوطه استعباط .. بستخدم الويب سايت دا type-scale.com بدل ما اعمل لنفسى الحسابات دى 😀 موش فاضيين احنا سيادتك ..

Grid System

6. النظام الشبكى “Grid System”

لو انت بتشتغل ويب , الموضوع بيبقى سهل , لان متوفر و بكتره ملفات للجريد سيستم الخاصه بالويب , و متوافقه مع فونديشن و بوتستراب وغيرها من الفريم ورك الموجوده حاليا. لكن لما بتيجى تشتغل على اى حاجه تانى , و يكون ال frame الخاص بالبروجيكت مقاسه موش شائع . هنا بتظهر المشكله .. لو انت موش فاهم يعنى ايه من الاساس جريد سيستم , موش هتعرف ازاى تخرج بجريد سيستم محترم للفريم بتاع البروجيكت سواء باستخدام بلجين او يدوى ..

تعالى نفهم اكتر ايه مكونات الجريد سيستم اصلا , او المصطلحات و الحجات المشهوره فى الجزئية دى ..

  • columns او الأعمدة .. و دى المناطق اللى بيتكون منها اصلا المحتوى .. ودى بتكون طوليه فقط .. بشكل رأسى .. موش افقى ..
  • modular او الواحدات .. ودى حاجه قريبه لفكره الاعمده .. لكنها مختلفه شويه فى التطبيق و الهدف منها .. و بتبقى افقيه , او بالعرض ..
  • row او الصفوف .. دى النتيجه للاعمده او الوحدات .. الشئ اللى بيتكون معانا منها بيبقى اسمه صف او row ..
  • gutter او القنوات .. و دى المسافه الفارغه او ال white space اللى بين الاعمده الخاصه بالمحتوى ..
  • midpoint او المنتصف .. دى هتلاقيها كتير اوى .. ممكن تبقى columns midpoint او gutter midpoint او حتى الميدبوينت للفريم كامل ! .. عباره عن نقطه فى المنتصف بين اى خط طول و التانى .. دا ببساطه اوى يعنى ..
  • baseline او خط الاساس .. ممكن اعتمد عليه و مشتغلش بالوحدات اول ال modular .. لكن النتيجه هتبقى سخيفه شويه .. و الافضل انه يكون موجود .. و خط الاساس , بيبقى برده خط افقى .. مجموعه منه بتكون معايا الوحدات او ال modular .. وعلشان تريح نفسك من النقاش .. بص هنا

نيجى للاستخدام .. دلوقتى فى المعتاد انت بتشتغل ب grid system عباره عن columns, row, gutter .. كويس , بس موش افضل حاجه.

كل ما بتزود فى مدى اهتمامك بالتفاصيل و تفاصيل التفاصيل فى اى بروجيكت بيطلع افضل .. العبره دايما فى ال UI بالتفاصيل .. من اهم التفاصيل , المقاسات , و المساحات الفارغه .. انت بتوحدها بشكل افقى , دا رائع .. و فى الرأسى .. انت فى الغالب بتعمل لنفس رول كده بتشتغل على اساسه .. جميل اوى اكلام دا .. لكن موش افضل حاجه ..

الافضل .. انك تشتغل Golden Grid System .. ودى علشان نبسطها اوى اوى .. تقدر تقول عليه ميكس لكل اللى فوق دول سوا .. يعنى بيبقى معاك جريد عادى .. و فيه موديلر , وبيز لاين . و ال midpoint لكل حاجه, حاجه كده عباره عن دوشه خطوط كتيره طول وعرض .. بس بفكر شويه موش لغبطه فى الفاضى ..

علشان تفهم الموضوع بشكل عملى اكتر .. جرب تدخل تعمل grid system بالموقع دا مثلا .. شوف بس التغييرات اللى بتحصل قدامك ايه .. هتفهم منها الفكره ..

و جرب تعمل موديلر جريد بالموقع دا .. شوف برده التغييرات اللى بتحصل .. هفهم فكره الاتنين .. الموديلر , و البيز لاين ..

دلوقتى الفكره بالنسبه ليك وضحت شويه .. بالنسبه للجريد الموضوع مفهوم لينا كلنا .. بالنسبه للموديلر .. انت بتعمل baseline وبتظبط البعد بينهم , و بتجمع كذا بيز لاين مع بعض , بتكون بيهم الموديلر ..

ايه الفكره من الموديلر ؟؟

نفس الفكره من ال columns .. انت دلوقتى لما بتعمل component موش بتيجى فى نص الاعمده و تقف .. لا اما بتعمله ١ , ٢ , ٣ , ٤ , ٥, ٦ , الخ دا بشكل رأسى ..

الموديلر نفس الفكره , بس بشكل افقى .. يعنى انت لما برده هتيجى تعمل components لازم تعمله اما ١ او ٢ او ٣ , الخ ..

طيب ازاى ادمج كل الكلام دا علشان اطلع حاجه مظبوطه ؟؟

انت مثلا عامل ال gutter مابين ال columns  ٣٠ بيكسل .. انا شخصيا بفضل دا .. هتعمل نفس ال gutter ما بين الموديلرز برده .. و يستحسن .. يكون طول الموديلر مع عرض ال column بيعملوا شكل مستطيل .. اغلب الشاشات حاليا مستطيله .. دا هيسهل الموضوع اكتر ..

كده انا وصلت لنقطه كويسه جدا .. عندى الاحجام مظبوطه بالطول و العرض .. و عندى المساحات الفارغه مظبوطه طول و عرض .. تتبقى نقطه واحده بس , هل انت هتعمل كل التباعد بين العناصر بالطول ثابته ؟؟ اقصد انى مثلا عاوز اسيب مساحه كبيره شويه تحت العنوان .. اعمل ايه ؟؟

سيب موديلر  كامل فارغ .. بال gutters بتاعته .. امشى دايما على القانون اللى انت عملته لنفسك .. علشان تطلع بحاجه مظبوطه متبقاش كل حته فيها من قصيده !

انا عامل لنفسى الجريد سيسيتم اللى بشتغل بيه . تقدر تحمله من هنا و ان شاء الله يفيدك ..

فى بلجينز تقدر تستخدمها برده زى .. guideguide.me

فى المثال اللى هتحمله .. انا بستخدم النسبه الذهبيه على component نفسها .. و كذلك على التصميم ككل .. و على ال sub component .. و بستخدم برده النسبه فى المقاسات و النسب ما بين اى حاجه زى الخطوط و غيرها .. نصيحه , استخدمها ..

white_space

٧. المساحات الفارغه او White Space

الجزئيه اللى فاتت يعتبر وضحتلك ٩٠٪ من المساحات الفارغه , هى اخدت تقريبا كل المساحات الفارغه “الخارجيه” .. لكن المساحات او ال padding الداخلى للكومبوننت ؟؟

باختصار .. لو فى خلفيه لاى component معاك فى البروجيكت .. اعمل فيه white space ما بين المحتوى و الاطراف .. بس لو ملوش خلفيه بلون مختلف عن خلفيه البروجيكت .. يبقى متعملش .. لانك هتقتل الجريد بالشكل دا .. هتخلى فى خلل ..

تانى حاجه متوضحتش .. ال white space موش مجرد مساحه فارغه مهمله او علشان الشكل يتظبط وخلاص .. فى الحقيقه , انت بتستخدمها علشان تجذب نظر المستخدم , او بمعنى ادق .. انت بتعرفه يقرأ ايه , و امتى .. و مدى اهتمامه بالمعلومه دى .. من خلال انك بتخلي حواليها مساحه فارغه اكتر .. بس كله من غير ما تهمل القوانين اللى انت ماشى عليها ..

حاجه اخيره قبل ما ننقل على نقطه تانيه .. ودى ممكن تعممها .. دايما بص لل components قدامك ك أب , متفرع منها ابن , متفرع منه ابن , وهكذا .. خليها قدامك زى شجره عيله .. و لما تحب تظبط ال white space بطريقه سريعه و متقنه .. ممكن تخلى مثلا الابن نص الاب . بمعنى .. لو white space عندك فى الاب 30 بيكسل , يبقى فى الابن ١٥ بيكسل .. و ممكن تبقى بالنسبه الذهبيه برده , بس فى الاخر عينك هى الحكم ..

Emphasis

يا مسهل

٨. Emphasis او الجاذبية

فى الحقيقه انا معرفش الكلمه اللى فوق دى المقابل اللى ليها فى العربى ايه .. هى بتعنى التشديد او التأكيد .. لكن معناها فى الشغل هى جذب انتباه بمعنى اصح ..

كل الحجات اللى فوق دى لما بتطبقها .. بتدى وزن لاجزاء الموقع . بمعنى ان المستخدم لما يبص على تصميم ما, اهتمامه مثلا هيروح للعناوين او او او .. فى حجات موش كفايه فيها انى ابقى محجمها بالشكل دا , و لازم تبقى حاله خاصه , دى زى مثلا لينك التسجيل , او لينك الشرا .. الاكشينز اللى انا فعلا هدفى من البروجيكت كله انها تتعمل ..

ادواتى ايه!؟

الجاذبيه ممكن تتعمل باكتر من حاجه , الخط , الحجم , خلفية , لون , لون الخلفية , ايقون , حركه , مساحه فارغه , و كتير .. ممكن تميز بيه العنصر الاهم فى تصميمك. لانك ممكن تبقى عامل شئ اسطورى . يا سلام , حاجه جاحده .. بس فى الاخر .. متحققش الهدف منها. لازم تفهم الهدف من كل سكرين .. هل الهدف منه ان اليوزر يشترى المنتج ؟؟ اهم حاجه عندى اللينك اللى ينقله للشرا .. الموضوع بسيط جدا, و له نتائج مهمه جدا .. اهتم جدا بالجزء دا.

unity

٩. الوحدة او الانسجام Unity

بالنقط اللى فاتت, برده انت بتحقق جزء كبير من ال unity سواء باختيارك الالوان , و تحديدك مقاسات الخطوط , و الجريد سيستم و توحيدك للشيبس .. انت عملت يونيتى .. لازم تحافظ عليها فى كل اجزاء الموقع.

خليك م الناس المعقده كده , زى حلاتى .. لو البروجيكت فيه لون موجود فى منطقتين شكيت بعينى ان اللونين مختلفين مع انهم المفروض لون واحد . بتبقى بالنسبه ليه مشكله ممكن توقف الكره الارضيه!

علمنى ال Perfect Pixels ؟؟  تعالى فى الهايفه و اتصدر 😀 .. الوحدة موش مفيده فى مجرد الشكل مترتب وخلاص ! لا , ببساطه المستخدم لما بيعرف يستخدم حاجه واحده من موقعك .. بيعرف يتعامل مع التانيه .. هو بيتوقع ان كل حاجه واحد بعد كده .. انت بتكسب ريليشن بين المستخدم و منتجك بسهوله ..

بشكل عام برده .. قد ما بتصغر الدايره اللى بتبص فيها عينك فى التصميم .. قد ما بتطلع بشئ رائع .. بمعنى. انك لما تيجى تحاول تشوف اخطاء او تشتغل على جزء .. اشغل نفسك بالجزء دا بس .. و بعدين تكبر شويه للاب اللى هو تابع ليه .. و بعدين تكبر شويه وهكذا .. لحد التصميم بالكامل .. افترى على البيكسلز .. ركز فى تصميمك لدرجه انك تخنقه هو نفسه من كتر التركيز ..

Critique

١٠. قائمة النقد او critique list

بعد ما عملت الموضوع دا كله , و طبقت كل الكلام اللى فوق دا , و اكتر من كده بكتير كمان .. المطلوب منك انك تطلع اخطاء ورا نفسك .. و تكون اشرس منتقد على وجه الارض لنفسك .. من غير ادنى رحمه فى اى  حاجه .. فى المرحله دى .. عامل نفسك زى ما تكون من معدات الحرب ! المطلوب منها انها تعمل وظيفتها بشكل بيرفكت .. مفيش اى فرصه للخطأ ..

متهنيش نفسك على اى حاجه روعه جميله جاحده انت عاملها .. كل اللى انت عامله دا عامله كأنه شئ غير جيد لحد ما يقنعك انه فعلا حاجه كويسه .. و خلى اكبر تقييم ليك “كويس” انت لازم كل يوم تدور ازاى تعمل شئ “رائع” .. متوصلوش .. علشان تفضل بتدور تعمل حاجه رائعه ازاى .. دا مفيد.

من هنا تقدر تحمل مثال على قائمه النقد .. كنت شوفتها فى كورس على treehouse من مده ..

 

اخيرا .. اسف جدا انى طولت , بس فى حجات حتى مديتهاش حقها فى الكلام , ان شاء الله قدام يكون فى بلوجات افضل فى جزئيات بعينها ..

دمتم سالمين 🙂

المناقشة و النشر