تجارب و مقالات

١٠ مميزات ل النينجا فى فريق العمل ! The Ninja in work team

   -   860

السلام عليكم , إن شاء الله تكونو دايما طيبين وبخير 🙂

فى اي فريق عمل , إدارته بتصنف الموظفين على اسس كتير جدا , و فى الاخر تظهر حبه مسميات. زى سنيور و جنيور و تراينر و بيجينر الخ!!

من وسط كل المسميات دى . فى مسمى فريد جدا .. هو Ninja .. ايا ما كان تخصصه , النينجا بيبقى عباره عن سنيور , بس ذكى .. مقاتل فى شغله , و حبه صفات تانيه فيها التقنى , و فيها الاجتماعى او طريقته للتعامل مع الامور بشكل عام فى الشغل. بشوف ان الجزئية الاخيره هى الاصعب , انت ازاى هتتعامل مع الامور ! بشكل عام , خلينا نشوف كده حبه حجات المفروض يبقوا فيك و بشكل بارز جدا لو عاوز تكون Ninja!

boks

١. اساس قوى جدا

فى المجال دا بشكل عام , فى نوعين من الناس اللى بتشتغل. واحد من المدرسه الجديده , و التانى من المدرسه القديمه. ال ninja لازم يبقى من المدرستين. بمعنى ادق. هو عارف تاريخ مجاله كويس اوى. وعارف كل تكنولوجى فى مجاله , قديمه وجديده .. الموضوع موش مفيد ؟ انت شايف انه كونه ميعرفش المنحنى اللى اتطورت بيه اى تقنيه بتفاصيلها بطرق الشغل فى كل مرحله مهم ؟؟

دى حاجه بيتقال عليها خبره . و دى الحاجه الوحيده اللى تخلى ال ninja يديك افضل حل. لانه عرف .. و عرف كويس و استفاد من تجارب قديمه. موش هيقع فيها النهارده تانى.

update

٢. تقنيات دايما جديده

هنا انا موش بقولك انك تبقى technology follower . دى كارثه موش ميزه. احنا بنتكلم هنا عن المعرفه. يعنى مفيش تكنولوجي جديده تنزل وانت ولا تسمع عنها, لازم تبقى عارفها. و تحضر دايما انك تستخدمها فى اول فرصه فعلا تستاهل انك تستخدمها فيها. لازم تبقى فاهم التكنولوجى الجديده باستمرار صح. سواء بقى هتابع ١٠ مواقع كل يوم بتدخل تشوف الهيدلاينز فيهم , و تخلى ليست كده لحجات يوميه هتقراها .. اعمل اى حاجه. المهم الهدف دا يتحقق.

1dd415c4908395a89a2b90af3579189e

٣. هادئ . و بركاااان

اه , هو الاتنين فى وقت واحد بس. ياما بنشوف طبعا موظفين “ظياطين”. احب اقولك ان اسهل موظف الاداره تتعامل معاه هو “الظياط” , دا واحد بوق , موش اكتر , ممكن يعمل لنفسه براند بلسانه وبس! لكن تيجى تدور على ال value اللى بيقدمها , و لا ال target .. فشخ جبهة ! ولا اى حاجه.

ال ninja شخصيه تقيله معرفه. تقل المعرفه دا دايما بيخرج شخص هادئ جدا. كلامه قليل. “موش معنى كده انه قفيل. هو فى الشغل موش بيتكلم كتير. بيديك بس الزتونه بالبلدى ” , راجل موش بيغلط. بيفكر كويس اوى قبل ما يتناقش مناقشه عبيطه , موش متكبر . بس بيحب يسمع. علشان من خلال معرفته , يقدر يحكم و يشوف الامور بالطريقه دى على نطاق اوسع من الاول.

بس منفعل جدا 😀

اه .. ميغركش الماسك الخشب اللى راكب دا. وانت قاعد قصاده بتهرى بكلام ملوش اى تلاتين لزمه. تخيل كميه البراكين اللى شغاله فى دماغه علشان هيقولك كلمه اتنين جمله حتى .. هتخليك تسكت قرن بعدها.

بشكل عام . هتلاقى الشخص دا , صامت. يسمع . و يوم ما يتكلم ميتكلمش الا المهم. بس موش معنى كده انه لما بيسمع , انه مستمتع .. بالعكس تماما .. هو شايفك حاجه من اتنين. اما بتضيع الوقت, اما انك تايه فعليا فى حل مشكله ما و بيسمع علشان يفهم اكتر ويعرف يحلها. فى الحاله الاول. خاف من رده فعله. لان شكلك هيبقى بقرشين!

ideas

٤. عارف كل حاجه

مفيش حد يعرف كل حاجه. اه حقيقه , بس دا بيبقى عارف كل حاجه! حتى اللى موش عارفه .. بيبقى عارفه 🙂

الشخصيه دى , تقدر تخليك تشرحلها اللى انت بتسألها عنه من غير ما تحس انك بتقولها معلومه لو ميعرفش عنها حاجه. بس دى موش الميزه الاساسيه فيه. ميزته الاساسيه انه عقله من كتر ما اشتغل فى المجال دا , بقى قادر على انه يخمن معانى و طرق استخدام التقنيات ! زى بالظبط ما انت ممكن تخمن معنى كلمه موش عارفها !

المجال بالكامل قايم على مجموعه افكار , مع الخبره. انت بتبقى عارف التقنيه من غير ما تعرفها. مثال صغير , عمرك ما سمعت عن تقنيه “كإسم بس” و جاتلك حبه افكار عن طريقه عمل التقنيه دى ؟؟ و طلعت الافكار دى صح ؟ او حاجه منها ؟ ال ninja واحد عنده الحته دى بشكل موسع جدا .. سميها حدس , سميها فراسة , سميها الاتنين ! سميها حتى أيمن !  المهم انها تبقى موجوده.

بس بما انه شخصيه ملزقه. و عارف ان الكلام بحساب فشخ .. فالراجل دا موش هتلاقيه بيتكلم عن حاجه عرفها بالشكل دا الا فى بطريقه بسيطه جدا. و بعدين راح على جوجل .. و تعايش 😀 .. عمل فيها دكتوراه مره واحده , علشان يبقى جهاز المره الجايه كويس اوى.

google

٥. جوجل صديقه الصدوق 😀

ببساطه. هو فى حاجه مميزه جدا متحاشه من قموسه بالكامل كلمه واحده بس هى “إزاى”. دا مستحيل تلاقيه بيقولك اطبقها ازاى ! مستحيل يسألك على حاجه .. الا لو من بره مجاله اصلا 😀 لكن جوه مجاله , موش هيسألك على اى تقنيه .. موش لاى سبب. الا لانه بيقدر وقتك زى ما بيقدر وقته .. يضيع هو وقته علشان يتعلم , لكن ميضيعش وقت تانى من فريق العمل. حتى لو شخص واحد.

hard work

٧. حريقه شغل “متقن”

خلى بالك اوى من كلمة متقن! الراجل دا بيعمل حاجه فى وقت قياسى . بنسبه خطأ متتعداش ال ٥٪ فى اسواء احواله ! الراجل دا بيشتغل اى حاجه و هو بيفكر فى ٩٠ حاجه , اهمهم الوقت , و الكواليتى و ال durability للحاجه دى و ازاى ممكن يتعملها reuse ! راجل فاهم موش حافظ يا عماد !! علشان كده بتلاقيه فى اى بروجيكت , هو اللى الحمل عليه , متهيألى لو فى تيم مكون من ٤ نينجا . هيطلع شغل متقن اكتر من فريق مكون من ١٠ سنيور ! و هيطلعهم فى وقت افضل كمان! و بأفكار أرقى.

busy

٨. مشغول و منظم

تقدر تعتبره دفتر مواعيد. بيعرف يتعامل كويس اوى مع الكروس اللى ممكن يحصل فى الديد لاين ما بين اى بروجيكت و بروجيكت تانى. م الاخر كده , الراجل بيقدر صح , و بيحسبها صح اوى .. فاهم انه عاوز يحقق هدف. و عارف هيوصله ازاى. عمرك ما هتاخد منه شغل متأخر ! عمرك ما هتستناه اصلا .. هو دايما هيبقى صاحب الخطوه الاولى فى اى حاجه .. موش بيحب يقعد كده لا شغل ولا مشغله .. ولا هيعرف يعيش بالشكل دا!

بيقدر يدير وقته كويس اوى. موش بتحس اصلا ان فيه حد مشغول بإدراته , راجل بيتعامل مع المواقف بشكل رائع.

target

٩. ميعرفش حاجة اسمها target

بإختصار . لانه معديه بمسافه كبيره. الشخص دا موش بيفكر انه يوصل للتارجت اللى طالباه الشركه من الموظفين. لانه ببساطه بيعديه و بيعلى عليه اوى. و هتلاقيه بيسابق نفسه. لانه عمره ما رضى عن نفسه. و لما بيدخل جوا نفسه رضا عن اللى بيعمله وجوده لمده تزيد عن الاسبوع بعد ما خلص البروجيكت. بيحس ان في حاجه غلط. وانه كده قرب يشطب 🙁 وبيسعى لانه يعرف اكتر. علشان يبقى بالنسبه ليه الشغل اللى لسه خالص من اسبوع دا. كان يقدر يعمله بطريقه احسن فى وقت اقل.  ببساطه , دا شخص بيعرف يكسب الشركه اللى بيشتغل فيها كويس اوى .. ال target يا منى!

break rules

١٠. بيكسر القوانين

دى نقطه الى حد ما لازم تبقى فاهمها صح. هو بيكسر القوانين , ممكن فى اوقات يعمل كده, بس دا عن علم. راجل عارف كويس اوى القوانين الكليه.. و فروعها , و ايه له علاقه بأيه منها , و متمكن منهم و من فهمهم جدا .. علشان كده قادر يكسر القوانين , يطلع بشئ افضل.

موش بيكسر قوانين علشان مزاجه كده. لا .. علشان فى الافضل. الراجل ميهموش كلمه انه بيكسر القوانين. يهمه انه يطلع شئ احسن من اى حاجه قبله. دا اللى يهمه. من غير ما حد يعرف يمسك غلطه واحده عليه.

فى النهاية …

ليه تبقى ninja ! ليه اصلا تتعب نفسك بكل اللى فوق دا ؟؟

والله على حسب , انت شايف نفسك عاوز ايه ؟؟ عاوز تبقى من جذور اى كيان تدخل فيه ؟؟ تسيب فعلا بصمه تخلى الكل يفتكرك بكل خير عليهم وعلى الكيان دا ؟؟ ولا عاوز تبقى موظف كويس كده و بتشتغل حلو و المرتب شغال و دا اخر املك ؟؟

اى كيان يقدر يستغنى من وجهه نظرى , عن اى شخص فيه. ايا ما كان تقله. بس ميقدرش يستغنى عن ninja الا لما يكون محضرله بديل و بديل قوى.

قيمتك = مدى اهميتك و احتياج الكيان المرتبط بيه ليك. فكر .. انت ايه ال value اللى بتقدمها ؟؟ لو حد غيرك مكانك .. موش ممكن يعمل حاجه افضل ؟؟ فى النقطه دى. انا كنت شوفت حاجه صغيره للاستاذ : شادى إنعيم. حاليا هو CEO فى سرمدى .. شوفها .. ممكن تغير تفكيرك 🙂


خليكم من الجذور 🙂

دمتم سالمين 🙂

المناقشة و النشر