تجارب و مقالات

من الخزعبلات فى طريق النجاح

   -   566

السلام عليكم , إن شاء الله تكونوا دايما بخير ..

الاول البوست هنا ممكن تعتبره تنميه بشريه 😀 لكن هو موش كده , هى مجرد مشاركه لبعض النقط ظهرت من خلال التجارب .. فى طريق اى حد عاوز يحقق اى حاجه , بتتكشف معاه اهميه لحجات كتير , و افكار من خلال تجربته اكتشف انها مغلوطه ! حتى إذا كانت مغلوطه على وضعه الشخصى , اكيد فى ناس غيره عندهم نفس النقط , المهم من غير كلام كتير , خلونا ندخل فى الموضوع على طول :

 

١. الشغف :

انا معنديش ادنى شك , فى اللحظه دى , ان الموضوع موش قصه إراده ولا قصه اى بتنجان , الموضوع ممكن نختصره فى كلمه واحده هى “الشغف” .. الشغف هو اللى بيبنى جواك الإراده , و اللى بيخليك قادر تكمل , شغفك بحاجه بيكون نابع من اعماق ذاتك “فشيخه اوى اعماق ذاتك دى :D” ودا اللى بيخلى الشغف النقطه الاهم من بين اى من المقومات المطلوبه علشان تكون قادر انك تكمل فى طريق تحقيقك لاى هدف .. حاول تعرف النهارده مصدر شغفك ايه بالظبط , بمعنى .. ايه اللى بيخلى عندك شغف بالشئ دا ؟ هل هو شغف نابع فعلا من ذاتك ؟ ولا شغف نابع من خلال بيئه حوليك ؟

اقصد ب بيئه حوليك , مجموعه اشخاص , او ظروف معينه .. ايا ما كانت الإجابه .. لو الشغف دا موش نابع من جواك انت وبس .. و لو مرمى لاى سبب تانى او مصدر تانى , حول المصدر دا بأى طريقه لانه يكون نابع من جواك انت .. فى الطريق , كل حاجه هتتغير , الدنيا كلها هتتقلب , و اللى هيفضل معاك هى نفسك وبس.

٢. الهدف :

من البدايه كده .. انا معترض على فكره انك لازم تحدد هدفك النهائى فى شئ معين جدا , يعنى مثلا تقول , انا هدفى انى ابقى صاحب شركه تطويريه بتعمل موش عارف ايه و ايه و ايه , و مستوى انتاجها و عملائها كذا وكذا وكذا ..

الطريقه اللى فوق دى معترض جدا عليها , لانها ببساطه مجرد تفكيرك فى الهدف بالشكل دا لمده مثلا تتجاوز ال ٤ سنين ولا حتى السنه ! كفيله انها تقتل الهدف نفسه و شغفه جوه نفسك ! كتر ترديد الهدف جوا نفسك و تحفيزك الكتير للهدف دا و هو محدد بالشكل دا , هيقلب بحاله من اللامبالاه الغير طبيعيه فى اوقات كتير , اه هتخرج منها , بس هيجى وقت هتدخل فيها و موش هتطلع اصلا ! و كل ما هتقرب اكتر , كل ما هتلاقى شعله الطاقه جواك بتنطفى اكتر واكتر .. الكلام دا خصوصا عن تجربه , اياك تعمل كده .. الهدف النهائى , ملكش اى سبب يخليك تحدده بالشكل دا

.. لكن ..

انت تقدر تحدد هدف تانى , بس بشكل اوسع شويه .. مثلا .. انا هدفى اكون فريق عمل , ينافس بشكل كبير جدا عالميا ! انا حددت هنا انا عاوز اوصل لايه “ك ماده” و هى فريق عمل او شركه .. لكن محددتش الوظيفه اللى توصلها الشركه دى بشكل قطعى ! و هنا انت بتتبع شكل تانى للاهداف .. و هو شكل افضل بكتير جدا من الاول .. الاهداف هنا بتكون مبنيه على كل خطوه انت بتاخدها .. بمعنى :

انت دلوقتى فى بدايه الطريق , و معاك هدف زى دا , اول هدف قريب هيبقى ليك , هو تكوين الفريق دا , بعدين هيبقى ليك هدف جديد و هو انتاج مشروع او تجربه الفريق , بعدين هيبقى ليك هدف جديد و هو انك تعمل مشروع افضل , او تنشر المشروع الاول على نطاق واسع , و بعدين هيبقى ليك هدف جديد انك تعمل مشروع مثلا افضل من اللى قبله فى مجال تانى انت مشتغلتش فيه لسه او مخرجتش ابداع فريقك فيه , و هكذا ,, هتلاقى الموضوع بسيط عليك  ,, هتلاقى دايما شعله الحماس جواك بتتجدد كل شويه بتجدد الهدف ..

هنا انا موش بقولك الغى الهدف .. بس بقولك اعرف كويس انت هتختاره و تحدده ازاى ..

٣. السبب :

بص , بقمه الاختصار .. السبب الوحيد لاى نجاح انت عاوز تحدده لازم يبقى ” أنا عاوز ابقى حاجه محترمه و كبيره و شخص ناجح لنفسى ” فى المقام الاول , و لازم السبب دا بكل الانانيه اللى بتحتويها معانيه ياخد الحيز الاكبر .. السبب فى الانانيه دى , ان انت الوحيد اللى واثقين انه موش هيسيبك فى الطريق ولا هيتبدل ولا هتخسره ..

و السبب ورا سعيك من الاساس لهدف ما , هو اساسه , لو اختفى , اختفى شغفك , بل اختفى الهدف نفسه ! معدش ليه قيمه ..

٤. من جاور السعيد :

وانت ماشى , حاول تبقى خفيف كده دايما , متكسرش ضهرك بقصص انت ملكش ايد فيها , و متأثرش على خطاك بخطى حد تانى .. انت هتمشى و هتسابق و هتبقى سريع جدا على قد ما تقدر علشان تحقق هدفك .. لو حد فى السكه وقع و مكملش , حاول معاه , مره , اتنين , تلاته لو عزيز عليك اوى .. لكن اكتر من كده , هو هيبقى بيضرك , ودا هو نفسه ميرضاهوش .. خليك منطقى ..

 

دى حجات يمكن عديت بيها من فتره قريبه , علشان كده حاضره فى ذاكرتى .. لو فى حاجه تانى مريت بيها , اكيد هشاركم بيها 🙂

شكرا على وقتكم .. و اتمنى تكونوا استفدوا ..

دمتمت سالمين

🙂

المناقشة و النشر