تجارب و مقالات

كيفية تقدير أسعار اعمالك

   -   492

السلام عليكم , ان شاء الله تكونوا بخير ..

هنتكلم النهارده عن نقطه اساسية جدا فى شغلك, ازاى تقدر سعر اى بروجيكت هتشتغل فيه اذا فرى لانس !؟ الموضوع دا مهم جدا , لانه بيه هتعرف على الاقل تضمن انك متتعبش على الفاضى.

الاول. انت لازم تحط شروط واضحه جدا للمشروع :

مكونات متقبلش اى زياده او نقص .. عدد صفحات معين مثلا ! وصف كامل للشغل , وبيتكون من ايه بالظبط , و طريقه محاسبة الزيادات هتكون ازاى ! و عدد الكونسبتس اللى هتقدمها فى التوتال , و عدد التعديلات , و فى النقطع دى , خلينا نتكلم بطريقه افضل شوية , و نقول الشروط المنطقية اللى ممكن تكون للتعامل معاك علشان ادوية الضغط و السكر اللى خلاص مبقتش بتحوق فينا 😀 و اللى جاى دا كمثال :

  1. للعميل الحق فى الحصول بحد اقصى على ثلاث افكار مختلفه.
  2. للعميل الحق فى طلب تعديلات “بحد اقصى ٣” على اى فكره معروضه , او طلب مناقشة الفكره , او رفضها كاملة.
  3. عدد الصفحات “رقم” و هما “كذا وكذا وكذا”.
  4. مراحل التسليم و المواعيد.
  5. طريقة محاسبة الطلبات الاضافية ” مثلا تقسم لانواع الشغل نفسه UI Design او UX Design , و تكتب تقدير لكل ساعه شغل فى كل مجال من شغل المشروع , دا هيفيد جدا ..

كمان لازم تكون ليك شروطك على العميل , انت موش عبد , و لو حد موش مقتنع بشغلك من البدايه قوله مع الف سلامه.

موش موضوع استكبار على الشغل ! ابدا والله , بس انت لما تشتغل على شغل تطلع فيه بصمتك الشخصيه من غير تخريب من حد , وقتها هتستفاد , لكن لو غير كده , يبقى اشتغل على كونسبت لاى موقع ولا ابليكيشن ! و طلع فيه لمستك , هيفيدك اكتر بكتير جدا ك تسويق لنفسك! و على الاقل موش هيتحرق دمك ..  لازم يكون اى حد بيتعامل معاك فاهم دى كويس ..

تحديد أسعار المشاريع :

نيجى لطرق تحديد اسعار المشاريع .. الموضوع كتير , فى طرق كتير جدا بتحدد سعر المشروع , و فى ناس بتعمل ميكس بين حبه طرق مع بعض .. شخصيا , بعمل زى منيموم , دا مضاف فى اى مشروع مثلا جنيه , و بعدين فوقه حساب عدد السعات فى تقدير كل ساعه “و تقدير كل ساعه برده بيبقى حسب المشروع” ..

فى اللى بيتعامل بطريقه تانيه , و هى الوقت بس او انه يعتمد على نوع المشروع بس ! و فى ناس بتبقى حسب العميل ! يعنى مثلا موقع شركه تحت بير السلم بجنيه , و موقع فودافون بمليون ! حتى لو هما نفس الموقع بالظبط !! خلينا نشوف بتفصيل اكتر الطرق دى.

١. حساب ساعات العمل فقط :

الطريقة دى سهلة , بسيطة , بس لو طبقتها بالحرف , هتبقى بتخسر فى كل مشاريعك من الاساس. الموضوع بسيط , انت بتعمل Estemation للبروجيكت , كل جزء فيه مثلا UX و UI و Front-End و مقسمهم , و لازم تبقى عامل هامش وقت ضايع فى كل جزء من دول , و كل جزء من دول , بيبقى ليه سعر مخصص , مثلا “الارقام المكتوبه لمجرد الواقعية” ..

  1. UX : 60$
  2. UI : 40$
  3. Front-End : 80$

و بتبدأ تشوف مثلا المشروع هياخد معاك ١٠ ساعات UX ,و بتدى نفسك وقت اكتر مثلا ساعه و بتحسب السعر فى الجزء دا .. و هكذا على كافة الاجزاء الخاصه بالموقع , و على الاساس دا بتعمل برده الخطة الخاصة بالشغل و التسليم.

الطريقة دى كويسه .. بس بكل الاحوال فيها انت بتتظلم , لو هتطبقها هى وبس !

٢. التقدير حسب مواصفات البروجيكت :

بصراحة بيعجبى الجزء دا , مغرى ماديا جدا 😀 , بس بتحس الموضوع اوفر ٩٠ شويه فى بعض الاحيان. هنا الموضوع معاك بسيط , انت مثلا فى بروجيكت لموقع شخصى , و لدكتور مشهور , الخ , شايف انك هتشتغل على المشروع دا اسبوع , و انت مقدر انشغالك خلال اسبوع بحيث انك تطلع حاجه ليها قيمه تكون مثلا جنيه اتنين تلاته ! خلص الموضوع !

فى بقى الادفانسد شويه فى الموضوع هنا ..

اللى بيقدر تمن البروجيكت عن طريق مواصفاته بالكامل , يعنى بيقدر تمن البروجيكت على حسب العميل مين ! و مستواه الاجتماعى ايه , و هيكسب كام من وراه , و قد ايه محتاجه , و اوفرز المنافسين , الخ !

٣. نسب فى المشروع ذاته :

فى نوع تالت , و دا الى حد ما قليل الايام دى , و دا اللى بيقرر انه موش هياخد اى ماديات , لكن هياخد نسبه من المشروع نفسه , يمتلكها مع الشخص صاحب المشروع. و النوع دا موش بيقبل اى مشاريع لانه فى الاخر بيبص للربح اللى جاى من قدام , سواء عن طريق شهرة المشروع نفسه او من خلال المكسب المادى العائد من المشروع.

فى شركات كتير بيكون عندها نظام شبيه بالنظام دا , و هى انها بتتبنى الفكره و تنفذها مقابل مثلا ٥٠٪ منها .. دى حاجه شبه كده ..

٤. الاسعار الثابته :

و فى النوع دا من تقدير اسعار المشاريع, بيكون الشخص محدد من البدايه ايه المشاريع اللى هيشتغل عليها , و سعر كل مشروع. الطريقة دى سهله جدا لو الشخص دا بانى framework للمشاريع اللى بيشتغل عليها خصوصا انه يعتبر فى المرحله دى بيوزع copy من المشروع بتغيير المظهر بنسبه معينه ممكن توصل ل ٨٠٪ , لكن كل الاسس اللى قايم عليها المشاريع بالكامل بتكون واحده. يعنى لو اشتغل ٢٠ مشروع موقع شخصى , هيبقوا فى الاخر نفس الملفات تقريبا و نفس الفكره. باختلافات. و برده جدير بالذكر ان ٨٠٪ من ال startups الموجوده فى الوقت الحالى بتشوف فى الحل دا مفعول السحر لكل مشكلاتها.

الأهم .. انت هتعمل ايه ؟

موش لازم تتقيد بطريقه معينة من حساب تكاليف المشاريع ابدا. ممكن تخلط مثلا اول ٣ طرق مع بعض. و تخرج بطريقتك الخاصه فى الاخر فى تحديد سعر المشروع , لكن متكونش مبالغ فى السعر المطلوب , ولا كمان تكون متدنى لمرحله تضر غيرك , او تقلل من قيمة الشغل بشكل عام فى السوق , لان ببساطه النهارده انت ممكن تعمل كده , لكن على المدى الطويل , اول حد هيضر من كده هيكون انت نفسك.

 

اتمنى تكونوا استفدتم ,

دمتم سالمين 🙂

المناقشة و النشر