تجارب و مقالات

تشتغل لوحدك ؟ طيب مع فريق ! انهى احسن ؟

   -   696

الجواب باين من عنوانه ..

موضوع انك تشتغل لوحدك .. سواء فرى لانسر , او حتى مؤسس لكيان ما انت بس الشخص اللى بتنتج فيه و باقى الاستف تنظيميين موش اكتر او سبورت للعملاء ..

او انك تشتغل مع فريق عمل متكامل .. سواء برده فكرتوا تبقوا فرى لانسرز و بتشتغلوا على بروجيكتس معينه او تكونوا مع بعض شركة او كيان منظم اكتر على ارض الواقع ..

كل طريقه عمل منهم .. ليها عيبوها و ميزاتها .. موضوع اتهرى قبل كده الفرى لانسر حر ! الفرى لانسر معندوش وقت فراغ ! الشغل فى الكيانات منظم اكتر .. الخ ..

فى الحقيقه موش دا اللى حابب اتكلم عليه .. اللى عاوز اتكلم عليه النهارده حاجه أعمق “عميق بقى و بشرب قهوه وكده” أعمق شويه فى النقطه دى ..

من خلال التجارب اللى مريت بيها .. و دا طبعا بتختلف من واحد للتانى ..

اولا .. انك تشتغل لوحدك ..

سواء هتشتغل فرى لانسر او هتكون كيان و تجيب ناس شغلتهم بس انهم بيساعدوك .. الموضوع الى حد ما كويس .. بس مرهق جدا ..

يمكن ك فرى لانسر .. انت وضعك اهون بكتير .. من انك تكون شمس بيدور حوليها كل ال support اللى معاك .. هتبقى دايما , بنسبة ١٠٠٪ موش فاضى ..

لا ! انت ممكن توصل لدرجه انك من كتر ما بتابع الشغل مع الناس دى , موش بتفضى تشتغل انت نفسك على شغلك ! اللى هو اساس شغلهم ..

بصراحه .. التجربه التانيه دى , مقدرش اقول عنها غير انها فاشله فشل اسطورى .. مستحيل تنجح تجربه بالشكل دا .. الا مع شخص من خارج المجال دا بشكل عام ..

و اكتر نقط اقدر اجمعها دلوقتى بخصوص الموضوع دا :

  1. الاداره الماليه + الابداعيه = فشل .. موش هتحقق الاتنين .. يا تفكر فى الماده , يا تفكر فى الابداع .. يا تعوض حاجه بحاجه ..
  2. انك تكون المسؤل عن كل حاجه .. من اول التعيين و ترتيب الموظفين كفريق ليك لحد دفع المرتبات .. قصه حزينه جدا !
  3. كونك صاحب الخطوة الاولى فى اى حاجه .. لازم يكون عندك وقت فراغ , علشان على الاقل , تفكر فى الخطوه دى .. انت لا هتكمل الخطوه ولا هتاخدها و هتوصل فى مرحله ان الناس معاك واقفه بسببك.
  4. شهر , اتنين , تلاته , هتلاقيك فعلا كرهت الموضوع بالجملة , و بتتخلى عنه جزء جزء ..
  5. موش هتتقدم خطوه فى تطويرك لذاتك .. إنسى دى ..
  6. واحدة واحدة .. هتلاقى نفسك منعزل جدا جدا جدا .. اكتر من الانعزال العادى .. انت كده كده منعزل , بس الجاى دا , بزياده كتير .

freelancer

بإختصار .. عاوز تجرب تبقى شغال لوحدك .. يبقى جهازك و مكتبك وانت مع نفسك و اسمك “freelancer” غير كده , يبقى بتهرج .. الموضوع هيبقى صعب ..

و لما تحب تشتغل لوحدك .. ك freelancer .. فكر فى كام نقطه الاول :

  1. اجهزتك , مكتبك , ادواتك .. كلها متحضره . او على الاقل اغلبها .
  2. ايميلاتك , سيستم شغل اونلاين . حاجه تدير بيها البروجيكتس الخاصه بيك . ودول كتار جدا !
  3. بلاش هوسة بالاجهزة .. بلاش هوس التكنولوجى اصلا .. هتخسر!
  4. لو انت فرى لانسر علشان عاوز تكسب اكتر .. لو علشان دا بس متكملش المقال ..
  5. لو انت فرى لانسر علشان عاوز تعمل جوده اعلى .. يبقى تشتغل اقل .. و بتكلفه اعلى .. تعمل شغل اروق .. من غير اى ضغوط ..
  6. اى فرصه ليك , اتخلص من العائق المادى .. اعمل حساب , ارمى فيه بشكل ثابت مبلغ كل شهر .. انساه خالص ..
  7. متحاولش تبقى تقيل .. خليك خفيف .. انت لوحدك .. ميبقاش مسؤول منك حد يستحسن ..
  8. استغل اى لحظه ينفع تستمتع بيها و تفك عن نفسك بيها .. اعمل سيستم خروجات لنفسك .. و حدد ساعتين كل يوم , بتنزل من البيت , من غير ما تفكر هتعمل فيهم ايه اصلا , اتصل بصحابك ! انزل على كافيه , اعمل اى حاجه , بعيد عن الانترنت تماما ..

دا كان بالنسبه لموضوع الفرى لانس , سواء حد هيساعدك او لوحدك ..

نيجى بقى لموضوع تانى .. مهم برده .. موش قوى .. لا قوى .. المهم .. نتكلم فى الموضوع على طول !

brain_storming

ثانيا .. انك تشتغل مع فريق ..

فى النقطه دى .. كل واحد فيه عنده مليون تخيل لكلمه فريق .. ببساطه , فريق بالنسبه ليا .. معناه ان مجموعه اشخاص , كل واحد مسؤل عن حاجه .. و بالطريقه دى بيتعمل الشغل بشكل اسرع و جوده اعلى بس تكلفة انتاجه بتبقى اكبر ..

الشكل دا ممكن تلقاه فى الشركات , و ال start-up .. و فى بيبقى بنظام دوام كامل , شيفت عمل ! او وقت للشغل محدد مثلا من الساعه كذا ل كذا كل يوم ,

و فى بيبقى الموضوع محسوب بالساعه ! فى بيبقى من مكان محدد , مكتب الشركه , او ورشه العمل , و فى بيبقى ريموتلى.

المشكله فى النوع دا من الشغل .. بتكمن فى ٣ نقط .. معينيين جدا :

  • اولا .. العقل الجماعى موش عقل ابداعى ..
  • ثانيا .. الحماس فايروس .. موش بينتقل و تشوف تأثيره .. الا لو سلبى !
  • ثالثا .. الغلطه هتعم على الكل 🙂

خلينا نتكلم عن كل نقطه لوحدها تماما ..

 

اولا . العقل الجماعى , موش عقل ابداعى ..

من فتره طويله او قصيره , كان عندى كتاب “الإبداع” ل “أوشو” و بغض النظر عن الحج أوشو و مريم نور , بس صعقت لما بدأت اقرأ و لقيت الكتاب بيقول ان العقل الجماعى موش ابداعى .. استمريت فى القراءة , لحد ما قعدت افكر فى كذا مثال .. الكلام كان صح !

تعالى نفترض ان ستيف جوبز , كان قعد مع حبه من صحابه .. و قرروا انهم كلهم يعملوا برين ستورمينج , علشان يوصلوا لشئ ما يعملوه ..

متخيل مدى الصداع ؟؟ مستحيل فكره مبتكره , تخرج من مناخ بالشكل دا ..

العقل الجماعى فى الحقيقه .. عقل يقدر يطور فكره .. لكن ميقدرش يوجدها .. لاننا كلنا مختلفين ..

و فى الحقيقه برده .. العقل الجماعى ميقدرش يطور فكره .. الا لو كان كل نسيج واحد .. متناغم .. و كل شخص فى الجروب بالكامل , حابب يبقى فعلا من جذور العمل .. موش مجرد انه بيشتغل وبس ..

تقدر تقول انك علشان تعدى من النقطه دى .. فى واحد , هو اللى بيقول وجدتها .. و الباقى كله , لازم يبقى نسيج واحد , كله عاوز يبقى من جذور الفريق , و متناغمين فى التعامل جدا , علشان يعرفوا يطوروا فعلا الفكره بشكل سليم ..

team_work_not_for_every_one

ثانيا .. الحماس فايروس .. موش بيتنقل و تشوف تأثيره الا لو سلبى !

للاسف .. دى كارثه بكل المقاييس .. الفرق بين الموظف .. و واحد من الفريق , تقدر تشبهه كده بأن اللى فى المصلحة الحكوميه “فى الغالب” موظف .. و الفرى لانسر . واحد من فريق ..

شوفت الفرى لانسر قد ايه بيبقى عاوز يموت نفسه علشان يبقى اهم حد فى الكون كله ؟؟ عاوز يستغل كل تاسك صغيره علشان يبدع فيها , عاوز يطور نفسه كل يوم , موش بيفكر فى وقت الشغل خلص ولا لا

ولا بيفكر انا خلصت تاسكاتى ولا لا .. بيفكر جوده الشغل , طالعه كويسه ولا فى الاحسن ؟ و الوقت ضاع ! ليه !!! و ازاى ؟؟ هل النتيجة مرضيه ؟؟

للاسف التانى 😀 .. صعب اوى تجمع فريق بالشكل اللى انا بتكلم عليه دا , او على الاقل , انا فشلت فى انى اعمل كده لحد اللحظه دى 🙁

بس اللى يدايق فى الموضوع كله , موش نقطه الفرق بين الموظف و العضو فى الفريق .. الموضوع اكبر من كده ..

بمجرد ما حد بيقع من الفريق , بفايروس الحماس .. هتلاقيهم واحد ورا التانى .. موش هتلاقى اى كنترول على الموضوع دا .. صعب .. رخم .. مرهق .. مجرد التفكير فيه بس يخنق اصلا 😀 كفاااااااية !

destroy_everything

ثالثا .. الغلطة هتعم على الكل ..

فى شغلى , انا بحب احسبها كده الاول “ساعه اتعمل فيها كذا وكذا من القسم كذا وكذا بالاعضاء فلان وفلان” , بعدين بتبقى رده فعلى موجوده .. من الاحسن انها تبقى سايلنت 😀

تخيل ان غلطه صغيره , تافهة , علشان تتصلح , و هى بين تلاته مثلا او اتنين او اربعه .. على ما تتصلح .. فى الغالب هتاخد ٣ اضعاف الوقت المعتاد ..

تخيل الموضوع دا بيحصل مره كل ٥ خطوات او تاسكات بتتعمل ..

على مدار اسبوع

فى يومين شغل راحوا فى داهيه ..

على مستوى شهر .. الديد لاينز باظت 🙁

علشان تعدى من النقطه دى . مينفعش غير حل واحد .. كل الاستف , يبقى نفس الخبرة فى المجال بشكل عام + يبقى فعليا مدرك للامور من منظور اكبر ! موش شايف الحاجه فى دايرة صغيره كده و الجو الديق دا .. ويبقى بيفكر بسرعه .. وملاحظ جيد .. ويبقى قادر يدير وقته فعليا لوحده .. دا الحل الوحيد اللى بينهى المشكله دى.

و اقدر اقسيها بين شركات كبيره و شركات صغيره اشتغلت فيها .. الشركات الكبيره .. كان ممكن المشكله تتقال فى نص دقيقه .. تتصلح فى خمس دقايق ..

نفس المشكله فى شركه صغيره هتاخد ساعه او اتنين .. و عن تجربه 🙂

 

 

فى نقطه تانيه .. لو الناس بتشتغل من مكان واحد , الموضوع بيبقى اسهل و لو فرى لانس او ريموتلى , الموضوع بيبقى اصعب ..

فى الجزئية دى .. احب اقولك ان woothemes لما بدأت كانت ريموتلى .. و اظن انهم لسه بطريقه مماثله , بس موش الكل !

فبلاش حبه خشب و كوبايه قهوة فى بلكونه الشركه تخليك تفتكر ان دا حل !

 

بس , تقريبا كده دا كل اللى قادر اعصر دماغى واجمعه دلوقتى , و لو فى فرصه تانيه .. ان شاء الله يكون فى بوست بيتكلم عن حجات بتفاصيل اكتر

دمتم سالمين 🙂

المناقشة و النشر