تجارب و مقالات

تريند !! إنت مصمم ..

   -   321

السلام عليكم , ان شاء الله تكونوا بخير 😍

فى اللحظه دى , او اللحظه اللى قبلها وانا بكتب البوست دا تقريبا فى على وجه الارض 7,384,907,026 بنى ادم .. لو كلهم مقتنعين بفكره انه فى كائن “انسانى” ما على وجه الارض له سلطه تحديد افكارك ك ديزينر , فانا موش منهم ابدا !  و بكل الطرق تقييمى لاى شغل معتمد و فقط على كلمه “تريند” بيكون صفر , و موش هنروح بعيد ! انت تقدر تفتكر metro ك concept او trend تصميم انتشر بشكل مبالغ فيه جدا .. هات مشروع اتعمل فى الوقت دا , بالتريند دى “كما انزلت , الترند من اجل الترند يعنى” و هات اى مشروع جمبه اتعمل بفكره موش مجرد ترند وخلاص .. و شوف انهى لسه عايش للحظه دى.

اسهل طريقه تقتل بيها اى عمل ليك , انك تاخد تريند و ترميه فى تصميم و تكون سعيد جدا بأنك اول انسان على وجه الارض يصمم بعين و عقل و ايد اشخاص تانيه 😀 او على الاقل .. هتبقى وصلتنا رساله ان ابداعك انتهى فى اللحظه دى !  فى الحقيقه كلامى فوق مستفذ جدا , لانى بكل الطرق , اتمنى انك بعد المقال دا تفكر فى فكره ال trends بطريقه تانيه .. هتفيدك كتير , و هتثري الاعمال العربيه بشكل عام , و الكل فى الاخر مستفيد ..

هو ايه ال Trend ؟

من غير تعقيد للامور .. ال trend من المعنى , هو شئ رائج الان ! او موضة بالعامية .. فى مجالنا , التريند موش مجرد موضه , يمكن اوقات كتير زمان كان الموضوع موضه موش اكتر.

بس حاليا الوضع اتغير تماما بقينا نشوف التريند ممكن يكون concept ! لو نفتكر كويس , فى فتره كان ٩٩٪ من مواقع الشركات و المؤسسات one page ! دا كان trend وقتها و ما زال ال trend دا موجود مع تعديلات , او تحسينات او تطويرات “و النقطه دى هنتكلم فيها لانها الهدف من البوست بشكل كبير جدا”.

ال Trend ممكن يكون UI Kit , و هنا كل اللى بنشوفه واجهة استخدام و اشكال “و اغلبنا بيهدر جزء كبير جدا من فكره ال  UI انها اصلا معتمده على تجربه مستخدم” هى اللى انتجت فى الاخر الشكل اللى قدامك .. و بسبب الفهم الخاطئ دا , ممكن تلاقى كتير بنطبق ال Trends من النوع دا , بس بطريقه غلط ..

ال Trend ممكن Framework , ممكن يبقى اقل و ممكن يبقى اكتر , فى الاخر , ال Trend هى فكره نالت استحسان الناس و بقيت مشهوره خلال فتره معينه .. بس فى الاخر اى تريند هتلاقى فيها 3 اجزاء مفيش غنى عنهم ..

الاول UX و التانى UI و التالت بيكون فى بعض الاوقات موش موجود و هو ال Technology ..

ال UX :

اغلب الناس موش بتلاحظه ف ال Trend لاننا بنهتم جدا و بنشوف بشكل مبالغ فيه ال visuals او ال UI , و فى الغالب انت ممكن تقع فى اخطاء كتير جدا حتى لو انت هتشتغل بال trend و موش هتضيف اى حاجه من عندك بسبب عدم فهمك الكامل لل UX اللى ورا الواجهه دى ..

جزء ال UX مقدرش اقولك غير انك لازم تستفيد بيه و تقراه كويس جدا و تفهم ليه هو اتعمل كده , و ليه موش معمول بأى طريقه تانيه. دى نتيجه researches كتيره جدا , مينفعش تترمى و بس من غير ما فعلا تدرسها و بجديه كمان موش لمجرد القاء نظرة و خلاص .. من الاخر , حاول توصل لاعلى درجه من الاستفاده منه. تجربه المستخدم , انت بتطور فيها مع التجربه , و فكره انك تشوف نتائج دراسات غيرك هى فكره جبارة علشان تبنى بيها معرفة و تجارب فى وقت قصير جدا يفيدك بعدين.

ال UI :

هنا بيبدأ العك بكل صراحه و بكل اسف برده .. ال UI ك designer مينفعش والله تشوفها غير تفاصيل موش مجمل ابدا ! يعنى , ال UI متشوفهاش componnets و لا تشوفها buttons ولا تشوفها slides ولا menus .. و عقلى مبيقبلش فكره انك تشوفها بالشكل دا من الاساس و تاخد الحجات دى و تطبقها ! الفكره نفسها مقبوله ؟

اللى ينفع تستفيد منه علشان تخرج شغل انت اللى عامله بإيدك فى ال Trends , هى مثلا colors toon , تشوف ازاى هو عمل generate للالوان و مشي بأنهى guidline فى الجزء دا ! تشوف مثلا ال grid system او ال moduller grid , و تشوف كمان هو ازاى حسب نسب ال white spaces و سواء كانت داخل العناصر او خارجها او بين ال componnets .. تشوف مثلا هو ازاى خرج ال typo بشكل مظبوط !

فى الحاله التانيه دى انا اقولك انت designer .. لكن الاولى , انت Front-End Developer بيعمل مشروع ملوش Designer او Back-End Developer عاوز يخرج شغله من غير ما يعتمد على Designer , بصراحه ممكن تكون اى حاجه , غير انك Designer.

لو مدايق من السطر اللى فوق دا , انا مدايق اكتر منك , لكن فى الاول و الاخر دى الحقيقه.

التقنيات ..

دى اكتر شئ خادع , تعالو الاول نفرق بين تقنيات ديفيلوب , زى فريم ورك جديد ولا حاجه تشتغل النهارده LESS بكرة تشتغل SASS

هنا الموضوع بسيط – فى افكار فعلا بتحل مشاكل , و فى افكار بتبقى باينه انها لمجرد التغيير , لكن الحمد لله , فى الغالب التقنيات اللى بتكون تريند من النوع دا بتكون لسبب منطقى يحترم !

المهم بس حاول متكونش Tech Follower لان انت كده كل ما تنزل حاجه جديده هتستخدمها على طول قبل ما تشوف ايه هيحصل او تبدأ ناس تستخدمها ف تقع فى مشاكل و تتحل و هكذا .. و انت وقتك فى الغالب مش هيسمح بشئ زى دا .. اكتفى وقت التقنيه الجديده بالتعلم و التجربه , لكن متشتغلش بيها مباشره فى مشاريعك , الا لما تكون موثوقه بشكل ما , او اتجربت من ناس تانيه , و بقى ليها مجتمع او على الاقل بدء يكون مجتمع ..

النوع التانى بيكون فى شكل برامج , مواقع خدميه , دى حلها للاسف بيرجع ليك انت , و لإيمانك لمعنى وظيفتك نفسها .. هل انت شخص بيتقن برنامج , ولا شخص بيتقن مهنه بكل خبراتها ؟

لو انت الحاله الاولى , عمرك هيبقى قصير جدا فى المجال ..

لو انت بتفكر بالشكل اللى فى الحاله التانيه .. فانت عارف كويس انك تقدر تعمل ويب سايت انشالله بالرسام ! محدش له عندك اى حاجه, المهم شغلك طالع صح و ال Work Flow متأسرتش بشئ ..

امال إيه لزمه التريند ؟

لزمه التريند اتكلمنا عنها فوق بالتفصيل , لزمه التريند الفكره , و دراستها , و انك تستفيد بيها فى اللى بعد كده , انت بيبقى قدامك خبرات ناس كتير , لفترات كبيره , متلخصه فى ١٠ صفحات مثلا ! دا فى حد ذاته شئ مفيد ليك و لمستقبلك فى المجال ..

حاجه تانيه , هفترض انك هتشتغل بالتريند كما انزلت .. مختلفناش , اعمل كده .. بس اعمل كده بعد ما تفهم التريند بالشكل اللى بتكلم عليه فوق دا .. بلاش تبقى تلميذ خايب .. خليك واعى و فاهم انت بتعمل ايه اصلا , مش كوبى وبيست و تقليد اعمى وخلاص !

 

بس خلاص خلصت ,

دمتم سالمين 🙏


Also published on Medium.

المناقشة و النشر