تجارب و مقالات

ترتيب و استحسان افكارك لمشروع جديد

   -   524

السلام عليكم , إن شاء الله تكونوا بخير ..

البوست النهارده عن شئ محدد جدا .. هو ترتيب و استحسان افكارك لمشروع جديد , موش بنتكلم هنا عن ان مشروع جديد , و بترتب محتواه او بتفهمه من جديد او او , لا المفروض انت عديت كل المراحل دى , فهمت المشروع كويس جدا .. و هتبدأ شغل , طبعا انت موش هتبدأ قبل ما تتبنى فكره عامه للنتيجه اللى محتاج توصلها. دا تحديدا النقطه اللى هنتكلم فيها النهارده ان شاء الله …

ابحث بس صح ..

٩٠٪ من قيمه المشروع تتلخص فى كلمه البحث. طبعا انت اول حاجه بتبحث عنها علشان تشوف افكار و منها ترتب افكارك و تخلق فكره جديده للعالم , دا بشكل عام الاستلهام مقولناش فيه حاجه ..

بس انت فى اللحظه دى اشبه بنحله ! على حسب جوده الرحيق هتكون جوده العسل ! مستوى الشغل اللى هتشوفه  , و هتحط نفسك فى مقارنه بيه و انك عاوز توصله او تعديه , هو اللى هتطلع بيه موش اكتر , و فى الغالب ممكن يبقى اقل كمان !

انك تكون منطقى , شئ جميل جدا ! بس فى النقطه دى بالخصوص , خليك حالم جدا ! قارن نفسك بمستويات اعلى منك بمراحل ! قارن نفسك بانتاج فرق عمل جبارة ! ابحث فى اعلى مواقع و متقبلش بأنك تخرج للعالم شئ اقل من الشغل دا ! هتتعب فى اول مشروع او اتنين تمشى بيهم بالشكل دا, بس فى فتره صغيره جدا هتلاقى نفسك بتطور , بتتعلم كل مشروع شئ جديد , موش واقف مكانك , مهاراتك بتتقدم جدا جدا , مستوى رد فعلك فى المشاكل اللى بتواجهك هيتغير ١٨٠ درجه.

فى البحث , خليك فنان , حالم جدا , و لو المنطق صندوق , ارميه من فوق برج خليفه !!!

إقتل الافكار الكويسة !

خلينا نتكلم بصراحه , اى مشروع انت بتشتغله , فى اجزاء انت بتبقى شايفها فاكهة المشروع , و اجزاء تانيه ” عادى جدا يعنى بتتعمل كده ” ..

نتكلم على الاتنين بقى , الاول فاكهة المشروع , وانت بتحددها , حط فى دماغك شئ واحد بس , فى فكرة كويسه , بس فى فكره اسطوريه ! حاول توصلها بكل الطرق , و مترضاش بالكويس وبس .. حتى لو حلو .. فى الاحلى و الاحلى ك فكره .. موش لازم تكون مجهده و متعبه فى تطبيقها ! ممكن تكون ابسط مما يكون , لكن فى الاخر جوده الافكار الاساسية للمشروع , او الافكار المميزه فيه , هتكون نقطه اساسية لتقييم المشروع النهائى , ركز اوى فى دى.

الاجزاء التانيه فى المشروع , موش هقولك حاول تخليها لا تتعدى ال ٣٠٪ من المشروع “لانى هفترض انك بالفعل بتعمل كده” , لكن هقولك الاهم ان حتى الاجزاء دى تكون موش مجرد عاديه ! قصاد حلين فى كل جزء هتعامله بالمبدء دا ..

اما انك تخلى فيه اختلافات ثانوية لكن تكون مؤثره فى الشكل العام. ودا سهل ! مثلا ال button ممكن اعمل عليه فى كل مشروع انيميشن مختلف و جديد تماما , و دا مثال على الحل الاول ..

الحل التانى .. انك تعمل فى فكره “كويسه” بس جديده ! هنا كلمه كويسه ممكن تقبلها !

حدد اهم اجزاء المشروع صح ..

دى حاجه مهمه جدا برده , متجيش تعمل الفكره الاسطوريه فى جزء فرعى من المشروع و انت عامل الاجزاء الاساسية بافكار زى ما قولنا كده “كويسه” ! الفكره هتظهر و هيكون ليه تقل و مكانه فى المشروع , بتقل و مكانه الجزء دا منه .. مجرد ترتيب بسيط , هيخليك عارف كويس فين الاماكن اللى المفروض يكون افكاره غير اعتيادية بالمره و يكون مؤثر فى تقييم المشروع ..

متعرفش ؟ اتعلم !

” انا معرفش هى تتطبق ازاى .. بس هتعلم ” .. الجمله اللى فاتت دى اكتر جمله بحب اسمعها من نفسى ! بحس بصراحه انى مستفيد جدا فى اللحظه دى , ان فى skill جديده هتضافلى , انى هتقدم لو خطوه بسيطه من مكانى !

خليك متفتح , انت موش اعلم واحد فى الكون .. و علشان كده , متفكرش بحدود معرفتك ! فكر بطريقه مجرده جدا من اى ضغوط او حدود , فكره و انتج فكره , موش مهم هتطبق ازاى ! انت هتتعلم ازاى تطبق ! و هتطبقها كمان و صح جدا !!

الباب الخلفى احسن بكتير ..

النقطه دى game changer بالنسبه ليا ! كل يوم فى تكونولجى جديده ! كل يوم فى plugins , و tools و الاف الافكار الجديده ! دى حاجه كويسه جدا تقدر تستغلها و بسهوله فى انك تطلع شئ جديد تماما , ببساطه ابعد عن نمطيه استخدامها المطروح بالفعل ! استخدمها بطريقه مختلفه و لهدف مختلف.

ببساطه , حاول ترمى هدفها الرئيسىي , و تشوف ايه الاهداف الفرعيه اللى ممكن تستخدمها فيها ! ممكن تطلع بأفكار رائعه فى وقت قصير جدا.

 

 

شكرا لوقتكم , ان شاء الله تكونوا استفدوا

دمتم سالمين 🙂

المناقشة و النشر