تجربة المستخدم

تجربة المستخدم – إزاى بتشتغل يا حج ؟ – ج2

   -   1540

يا ويلكم , إن شاء الله تكونوا دايما بخير 😍

اسف على التأخير , بس لظروف ما على الكوكب الجميل بتاعنا

البوست هنا هو الجزء التانى من سلسله بوستات بالعامية المصرية من خلالها حابب اعرفكم طريقتى فى شغلى الشخصى بتكون ازاى, بدأنا مع الجزء الاول | تقدر تشوفه من هنا | و كان بيتكلم فى مجمله عن تجميع الداتا و الاتفاق على المشروع المبدئ , و هنا بنكمل مراحل الشغل نفسه

استراتيجية العمل

متاخدش الكلمه على صدرك اوى, الموضوع بإختصار ان فى ناس قبلنا بقرون بدأت تشتغل على تجربة المستخدم لحد ما وصلت للوضع الحالى, الناس دى و على مر الزمن “حلوه على مر الزمن دى” بدأت تكون مراحل و خطوات معينه علشان تشتغل بيها , و كل شيخ له طريقه ! فكل واحد طلع الطريقه فى هيئه استراتيجية و من هنا بدأنا نشوف الاستراتيجيات الكتير اللى نقدر نشتغل بيها فى تجربة المستخدم.

سامعك ياللى بتقول انا مالى , ما اشتغل من غير الكلام دا احسن و افضل !! و اهى كمان تبقى طريقتى ! بس ليه تجيب العجله من الاول ؟ بسط الامور و استفيد من تجارب الناس اللى فاتت و اللى فى الغالب اكتر علم منى و منك

طيب هل مطلوب منك تعرف الاستراتيجيات دى دلوقتى ؟؟

لا يا سيدى , انا عاوزك بس تعرف الكام سطر الجايين , مجرد اسم الاستراتيجيه و الهدف منها و تعريف بسيط ليها وبس , و المره الجايه هنبقى نبص عليهم تانى

User Centerd Design – UCD :

من غير تعقيدات , هى الاستراتيجيه الحديثه الأم .. هتسألنى ليه حديثه , هقولك مدخلش نفسك فى تفاصيل دلوقتى يا مدحت , بس عاوزك تكون فاهم ان قبل اليوزر سنترد , فى اطنان ورق تقدر بعدين لما تفضى تبص عليهم

اليوزر سنترد هى اكتر الاستراتيجيات فعالية , لانها بتعتمد بشكل كامل على دراسات موثوقه و كامله و شامله لكل شئ , بدايه من دارسه المستخدمين و اختبارات الاستخدام و كل كل شئ حرفيا , و هى طريقه فى زمنا دا بقيت كلاسيكيه   لحد كبير , لكن .. يفضل كونك فاهم دى معناه انك فاهم كل حاجه فى اى استراتيجيه غيرها , و علشان كده هنتكلم عنها كتير قدام بس دلوقتى خلينا مع الماب الخاصه بيها فقط , و دى بتوضح مراحل العمل بيها

بقرايتك للى موجود فوق , هتلاقى ان الموضوع فيها لا يحمل القسمه على اتنين تماما ! انت بتعمل كل شئ بتفاصيله , و دا بيخلى قرارك الاخير فى تجربه المستخدم لا رجعه فيه بنسبه كبيره جدا , مناسب جدا للمشاريع الكبرى و المؤسسات الكبرى , و عيبه انه مكلف جدا بالنسبه للمشاريع الناشئة.

Design Thinking :

حلوه و بنت ناس , بس من خلال معرفتى , مينفعش تستخدمها الا فى حاله واحده او حالتين , و هما إنك تكون  موش عارف فكره مشروعك ايه بالظبط , او بمعنى ادق , انك تكون عارف ان المستخدمين بيواجهوا مشكله ما فى حياتهم , لكن موش قادر تحدد فكره المشروع اللى تحل المشكله دى

يعنى مثلا , المستخدمين بيتخنقوا من التاكسيات , طيب انا اقدر اقدم ليهم ايه يحل المشكله ؟؟ هل شركه تاكسيات خاصه , ولا خدمه الناس تشترك فيها و توصل اللى طالبين تاكسيات بعربياتهم الخاصه ؟ دا مثلا لو اوبر ! لو اصلا فكره اوبر موش موجوده , او لو اللى اسس اوبر معندوش اصلا حل , او لو عاوز يحدد حله للمشكله دى صح ولا غلط

بتعتمد على اليوزر هنا بشكل كبير جدا ! انت اصلا بتجرب الافكار و الحلول اللى من خلالها بتستنج فكره المشروع الاساسيه من خلال المستخدمين نفسهم موش من خلال وحى خيالك ! يعنى اليوزر معاك فين ما تروح , و دى خريطه بسيطه توضح الاستراتيجيه دى

المخطط اللى فوق يعتبر اساس الاستراتيجية دى , و هى استراتيجيه فى الاساس لانتاج الاختراعات اكتر منها لتجربه مستخدم , لكن فى كتير طوعوا منها نسخ زى الجايه دى مثلا

شوفت انت الاتنين ؟؟ رأيى الشخصى بقى و ارميه فى الزباله لو موش عاجبك .. الديزين ثينكينج مينفعش نقول عليه اصلا تجربة مستخدم , لكن هو طريقه رائعه لإنتاج افكار او اختراعات تقوم عليها تجاره رابحه فى المستقبل , اكتر من كده إنت بتهرج , لإن حتى التطويرات على الاستراتيجيه فى محاوله بائسه علشان تخليها اقرب لتجربه المستخدم , تجارب بتفقدها معناها الرئيسيى اللى بيكمن فى كونها عمليه “تفكيريه” متكرره بتوصل من خلالها لحلول مطلقه بعدها تقدر تطوع الحلول دى علشان تكون  مناسبه للمستخدم و هنا بتيجى دور تجربه المستخدم. يعنى 70% منها بيزنس , و 30% منها تجربه مستخدم على اقل تقدير ..

Lean UX :

متاخده من فكره Lean startup , و ببساطه هى اسرع طريقه لإنتاج شئ , و بتعتمد على الاختبارات و التعامل مع المستخدم علشان نعرف مدى صحة الحل اللى وصلنا ليه , و اضافه تحسينات عليه.

 ببساطه هنا إحنا بنجمع بيانات بتكفى اننا نكون واخدين فكره كويسه عن البروجيكت بشكل عام , و مستخدمينه و المنافسين , و بعض المعلومات التفصيلية اللى ممكن نحتاجها على المستخدمين, بعدين بنبدأ نشتغل ,و ننتج مثلا ويرفريمز بجوده متوسطه او قليلة , و بعدين بنختبرها مع المستخدمين و بعدين بنشوف هل الحل صح او غلط و بعدين نعدل حسب النتايج للاختبارات مع المستخدمين , و بنعيد الدايره دى من تانى , و علشان كده اذا بتحاول تشوف تعبير مناسب لوصف الاستراتيجى دى هيكون دواير التعلم او Learning Circles, و الشكل الجاى دا بيوضح المراحل الخاصه بالاستراتيجى و فكرتها العامة.

Agile UX:

اساسها و من الاسم نفسه تقدر تعرف انها متاخده من Agile Software Methodology.

بتهدف فى اساسها لتوحيد او التقريب جدا مابين اللى بيشتغل عليه الديزينر و الديفلوبر فى نفس الوقت بحيث انها تختصر وقت كبير جدا , للاسف انا لدلوقتى مشوفتش حد بيطبقها صح , و فى الغالب بتكون نتيجتها ان الديفيلوبر يعمل اكسبرينس زفت و الديزينر يحاول يصلحها لا اكتر ولا اقل

هل الاستراتيجى دى مفيده ؟

, هو بنى ادم قرر انه يمسك Lean UX يخليلها تنفع مع ال Agile و راح مسميها Agile UX لا اكتر ولا اقل .. ودا مخطط بيوضح خطواتها ..

من الصوره اللى فوق نقدر نفهم انها ببساطه عباره عن Lean UX لكن فى شكل سبرنتس , و الصوره الجايه بتوضح كل سبرنت ايه اللى بيحصل فيه و ازاى بيكون فى ترابط بين التصميم و البرمجه فى الوقت نفسه.

اللى فوق اسهل طريقه تقدر تفهم بيها الاستراتيجى دى , خصوصا انها بتوضح طريقه او فكره التداخل بين شغل الديزين و الديفيلوب فى نفس البروجيكت, الفكره كويسه , بس محتاجه فريق عمل خاص جدا , و واصل لمرحله من التفاهم و التناغم صعب الوصول ليها بسهوله علشان يكون البروجيكت طالع بشكل محترم

تانى شئ سئ , انها فى اوقات كتير بتحدد و بتحجم تفكير الديزينر فى دواير و حلول و خيارات صغيره جدا و دا بينعكس على تجربة المستخدم اللى بتطلع و اللى فى الغالب بتكون إما عادية او سيئه فى الحالة دى

هنتكلم عنها قدام بشكل مفصل بحيث انك تفهم فكره Agile نفسها و بناء عليه هتفهم ليه انا حاطت الشكل اللى فوق دا خصوصا ليه , و موش اى شكل تانى موجود اونلاين.

ليه بقى دا كله ؟

فى ملايين من الافكار كل يوم بتخرج , و فى استراتيجيات كتير مختلفه , بل فى اللى بيطبق استراتيجيه خاصه لكل مشروع على حسب المشروع نفسه و موش بيقيد نفسه فى انه يستخدم استراتيجيه بعينها , لكن معرفتك للاستراتيجيات بيسهل جدا إستيعابك للخطوات الصغيره , يعنى مثلا لما تعرف ان الريسيرش الخطوه اللى بعدها Analysis هدفها انك تستخرج مثلا Personas فبتعرف اكتر ازاى تشتغل ال Research لانك عارف الهدف منه

متكتفيش بالمعلومات اللى فى البوست هنا , و حاول تبحث اكتر و تفهم اكتر و اكتر الموضوع

و البوست الجاى بيكون فيه تطبيق واحده من الاستراتيجيات الموجوده , و التمهيد لدا , وصولا لانتاج شئ نهائى فى نهايه السلسله دى بإذن الله,

لحد البوست الجاى , كونوا بخير إن شاء الله 😍

دمتم سالمين ☺


Also published on Medium.

المناقشة و النشر