دوشة حروف

القاهرة .. بعيدا عن شرورها !!

   -   360

السلام عليكم , إن شاء الله تكونوا بخير 🙏🏻

بالنسبه ليا .. القاهرة هى مدينه شريرة جدا .. بكل اجزائها ! يمكن انا بشوفها كده لانى اتعودت على ان المكان اللى عايش فيه فيه خضرة , تصحى على صوت عصافير فى اغلب الاوقات , هادئ .. بيناموا بدرى و يسيبوك انت ونفسك كده من بدرى بدرى , تعرف اغلب الناس و الناس كلها تعرفك موش شرط تكون اجتماعى يعنى !

بس كلنا بنبقى فى وقت ما غصب عننا مقيمين فى القاهرة , على الاقل لفتره وجيزه , سواء لتخليص اوراق او اسباب تانيه “اللى من بره مصر , مصر حكومتها مركزية .. فى بعض الاوراق مينفعش تخلص الا من الاماكن المركزيه اللى مقرها القاهرة” , فى الاوقات دى احنا لازم نعرف نتعامل مع الموقف ازاى , و ايه الطريقه المثاليه اللى تخلينا نعدى الفتره “العصيبه” دى من حياتنا 😏

هتبقى مقيم فين ؟؟

رمسيس .. بكل الطرق متخيلش انك عاوز تنجز اى اوراق فى القاهره , خصوصا لو هى فى كذا مكان .. او متبقاش عارف وجهتك بالظبط , و تقيم فى القاهرة فى اى مكان غير رمسيس ..

اول ما بتقول رمسيس بيجى فى بالك لوكندات نص كم جدا , الموجوده فى المنطقه المجاوره بشكل عام لمسجد الفتح , بس جربت تتعمق فى الموضوع اكتر و متنزلش على عماك ؟

بالنسبه ليا فى رمسيس رقم 1 من الاماكن النضيفه هو فيكتوريا .. موجود فى شارع الجمهورية و المكان نضيف جدا , التعامل راقى جدا + ان الاسعار منطقيه يعنى موش اوفر ولا هو سياحى ! “فى اماكن فى القاهره اليوم فيها بيعدى ال 1000 للمصريين ! ما بالك لو من الخارج ؟”

فى فنادق كتير بصراحه و لوكندات جربتها , بس افضلهم فيكتوريا ,, مكانه ميتوهش ابدا .. فى شارع رئيسي .. المكان بشكل ما بياخدك لحقبه زمنيه قديمه رائعه .. النضافه ممتازه .. بس فى الغالب ممكن تلاقيه محجوز , فالافضل يكون عندك تواصل مع حد فى المكان قبل ما تيجى ..

مواصلاتى ازاى ؟؟

رمسيس .. يعنى كل حاجه متاحه .. بالنسبه ليا الموضوع مقتصر فى مواصلتين “المترو” و “التاكسى” .. بمعنى .. انى مثلا رايح الدقى , هركب المترو لحد الدقى .. المكان اللى رايحه بقى تحديدا فى الدقى لو مكسل من المشى , عادى تاكسى و توصل لحد عنده ..

بالنسبه للتاكسى .. اولا .. متركبش مع حد موش عارف بالظبط المكان فين لو انت اول مره تروح المكان دا + وصفك يكون دقيق جدا + لو مشغلش العداد بعد ما ركبت قوله على جمب و انزل و سيبه … خليك مستفز زى ما هو مستفز تماما 😫 ..

التاكسى الابيض فى اسود .. اسعاره منطقيه .. بصراحه للحظه اللى بكتب فيها البوست دا مفيش تاكسى اسود صدمنى فى السعر اللى بيقوله ابدا .. و الاسعار اللى بيقولولها منطقيه ..

ليه متجيش بالعربيه ؟

لخمة .. هو اه شئ جميل ان تحت ايدك عربيه وقت ما انت عاوز تدور و تمشى و خلاص ! بس فى القاهره هتكره نفسك فى الزحمه و اللخمه و الركنه و و و و و .. فبلاش من اولها .. الا لو موش لوحدك .. الوضع ممكن يتحسن شويه.

صاحب الناس .. الوقت هيعدى ..

علشان تخلص من طابور .. ليك حل من اتنين .. إما انك تشوف اى “رشوه” اه هى رشوه ,و تدفع و تنجز اللى انت عاوزه .. او انك تستمع بالوقت مع الناس .. بالنسبه ليا , مفيش ورقه بروح اخلصها الا و اتصاحب على حد من اللى واقفين فى الطابور .. عيش وسط الناس الوقت هيعدى و موش هتحس بيه + انك هتستمع بالوقت دا .. و هيبقى ليك ذكرى حلوه موش شبح يعنى ! و كمان هتعرف عن الناس اكتر و اكتر و هتشوف اكتر و اكتر و اكتر .. ودا مفيد ليك فى باقى حياتك , خبرات برده 😜

من بعد العصر .. تبدأ رحلة الاستمتاع ..

بعد العصر بساعه هو توقيت مثالى علشان تزيل كل قرف اليوم كله ! رجعت و اخدت شاورك اللذيذ و غيرت و ارتحت شويه ممكن تكون اتغديت او لا موش مشكله لكن على الاقل اخدت الريست الكافى ..

لو انت عاوز تعيش حياه ملزقه ..

عندك اماكن كتير تقدر تعييش فيها حياه ملزقه جميله .. بالنسبه ليا افضل كافيه بحب اكون فيه لو دا مودى .. هيبقى بورتو اسوان .. قصاد جنينه مول على طول , او اى فرع ل سيلنتروا .. و ابعد عن مصر الجديده فى سلنتروا لو انت موش Open Mind 🤔 ..

ممكن برده فى المهندسين .. فى كافيه فى اخر شمال فى البطل احمد وانت داخل جامعه الدول .. للاسف موش فاكر اسمه بس هو جميل يعنى, و فى بعض الكافيهات التانيه اللى ممكن تروحها و اللى الكون كله يعرفها بس عامه , دى موش القاهره اوى يعنى ..

لو انت موش ملزق ..

الحسين .. لو موش ملزق اوى اوى , يبقى الفيشاوى فى الحسين و مستحيل تكون موش مستمتع بالمكان و بزحمته !

لو انت ملزق شويه , بس عاوز تنزل الحسين .. فى نفس الشارع بتاع الفيشاوى , هتلاقى بعده بشويه لقدام نجيب محفوظ , لو لسه متغديتش , نقى المكان اللى “هتضرب” فيه من بره , مترمرمش و النبى عاوزينك سليم 😂

متغديتش ؟؟

بص خلينا واقعيين .. انت هتاكل وربنا يسترها .. بشكل عام دا قانون الاكل بره البيت فى اى مكان ايا ما كان 😖 ..

ملزق فى الاكل و عاوز مكان ثقه ؟

تيكا , سيلنترو , ممكن ام حسن لو عندك استعداد “المكان نضيف جدا + انا نفسى بحبه جدا” , و طبعا شله المطاعم البراندات , زى ماك و هارديز و غيرها .. بس بكل الطرق متدخلش كنتاكى والنبى .. بلاش .. مصمم ؟؟ .. على مسؤليتك بقى !

موش ملزق ؟؟

جرب , احسن حاجه انك تجرب ! و كله على الله , بس حاول ييبقى فيه الحد الادنى من النضافه , و للامانه ,, فى بعض عربيات الفول اللى لا يمكن تتنسى و ارجوك .. ابعد عن رمسيس فى الاكل , و لو مفيش حل تانى غير الاكل فى رمسيس يبقى بلاش اى عربيه فى الشارع + نقى مكان كويس ظاهريا على الاقل ..

كورنيش و حلبسه 😂

بالليل لو ملحقتش على الاقل ساعه هناك .. فإنت لسه مروحتش القاهره ! بس حاول تبعد عن الزحمه , يعنى اختار ابعد كوبرى و اقعد فيه ! و استمتع .. وحياه الغاليين استمتع شويه .. و انزل الكورنيش , و قصر النيل .. عيش شويه الجو دا هتحس انك بنى ادم تانى اصلا !

مفيش مانع من الدرا المشويه .. و لا فى اى حاجه تمنعك من انك تشرب كوبايه شاى مجهوله المصدر او قهوه لو شميت ريحتها و عجبتك يعنى !

بالحق .. اللبس ..

اياك , تنزل تعمل كده بلبس يتحكم فيه و موش مديك حرية كافيه و مريح بالشكل الكافى .. افضل ما يمكن لبسه فى مشوار زى دا برمودا + قميص او تيشيرت و كوتش رياضى او فلات ..

الختام ..

القاهرة مكان مينفعش تعيش فيه باقى عمرك “نظرتى عنه” او تقيم فيه بشكل كامل .. لكن مكان ممكن يتقعد فيه لمده اسبوع و تعرف تتجنب سلبياته او على الاقل تقلل من اضرارها النفسيه 😎

طبعا انت اكيد عارف الاماكن الاثريه زى الهرم , القلعة , و غيرها , و دى كلها اماكن كانت موش موجوده لانى مصمم انى موش هروحها الا فى وقت معين إن شاء الله ..

استمتعوا بالزيارة الجايه إن شاء الله للقاهرة ..

دمتم سالمين 🙏🏻

المناقشة و النشر