تجارب و مقالات

العمل من المنزل ؟ مسؤلية أكبر !

   -   1006

السلام عليكم , إن شاء الله تكونوا بخير , و رمضان كريم 🙂

الاول بسرعه كده , فى فكره متاخده عن العمل من المنزل او الفرى لانسينج , فكره غلط خالص لازم تتغير .. ان انت “حر” بصراحه دى كلمه بتضحكنى جدا , انك موش “ملزم” بحجات كتير او بتتعامل براحتك , دى برده من الحجات اللى بتضحكنى اكتر , و انك عندك وقت و و و و وو و و و .

بص . من البدايه كده موضوع الشغل من البيت , لا هو وحش بشكل مطلق . ولا هو حلو بشكل مطلق. زيه زى العمل من خلال شركه فى دوام ثابت و بشكل منتظم. بس خلينا نعتبر اصلا ان البلوج دى خاصه بحاجه واحده بس .. ازاى تخلى تجربه عملك من المنزل ناجحه.

الموضوع ان شاء الله سهل. او صعب بس علشان نهايته هيبقى سهل بأذن الله. تعالو ناخد متطلبات انك تشتغل شغل ناجح من البيت بالترتيب فى ارقام كده و نتكلم شويه عن كل نقطه بحبه تفصيل. و فى الاخر ليكم حريه الحكم.

١. الخبره :

كلمه لزجه شويه. المقصود هنا , ان يكون عندك خبره موش بس تيكنيكال , او مشاريع قديمه فرى لانس او سابقه اعمال وبس. لا , انا اقصد هنا خبره بسيستم الشركات “المحترمه” . ازاى شركه ما بتخرج بمنتج من منتجاتها , يكون عندك حساسية الشغل دى .. فاهم كويس انت بتعمل ايه , و ليه , و ازاى .. و هل فى طرق تانيه ؟ و لو فى طرق تانيه انهى احسن ! و فى انهى حاله اصلا ؟؟ وقتها انت تقدر على الاقل تعامل نفسك ك شركه . او فرد فيها .. هتقدر تتعامل مع الشغل المتوقع انه يجيلك . و هيكون سهل عليك تدخل فى اى تيم او تتشارك العمل مع اى كيان اونلاين.

ازاى توفرها ؟ فى طريقه سهله اوى .. بس فى كتير موش بيحبها . شخصيا انا بشوفها الطريقه الوحيده. انك تاخد خبره صح , انك تنزل تدرب فى شركات. استنضف كام كيان , و انزل ادرب فيه . موش علشان تدرب بس . لا علشان تفهم حجات كتير جدا , و واثق , ان نص فكرتك هتتغير. هتفهم انك كنت متصور حجات كتير جدا بشكل خاطئ. واللى هتتعمله و الخبره الفعليه اللى هتكتسبها , هتكون سبب رئيسيى فى نجاحك بأذن الله.

٢. بيت المال 😀

اه . انت موش هتضرب الارض تطلع شغل و يخلص و تكسب ! الموضوع موش كده خالص. انت ممكن تفضل ٦ شهور فى دوامه لحد ما تبدأ تحس بمردود للى بتعمله. و ممكن تفضل تحضر كتير جدا. المطلوب منك , انك توفر جزء مالى للمصاريف , انت هتصرف خلال كل شهر كذا. توفر مثلا ٤ شهور , او ٣ شهور. علشان فى مواقف كتير جدا قدام ممكن تقابلك متعرفش تتصرف , او مثلا تقبل شغل موش موافق عليه تحت ضغط انك محتاج لمردوده المالى. ودا شئ مرفوض. هيخليك تكمل غلط لفتره موش قليله.

٣. ادواتى ..

ببساطه. انا ممكن اروح لخياط يعملى مثلا قميص .. لو فى خياط تانى معندوش مكن خياطه , او المكنه عنده سيئه . موش هروحله 🙂 و دا حقى جدا , مهما كان مبدع , طالاما موش هيعرف اصلا يخدمنى.

انت بموافقتك على العمل اونلاين. بتلتزم بشكل لا يحتمل القسمه على اتنين بتوفير كل ادواتك . العميل موش مسؤل تماما عن اى نقص فيها او ان ادواتك موش متوفره. دا ميخصوش نهائيا . و اى غلطه بسببه انت الوحيد اللى تتلام.

اللى انت محتاجه. جهاز ينفع تشتغل عليه شغلك بشكل مريح. انترنت سريع. اى ادوات تانيه جانبيه انت بتشتغل بيها. زى البرامج او مثلا فى ال UX بتبقى سكتشات اقلام , الخ. اى حاجه من دول يحصل فيها مشكله . مينفعش العميل يحس بيها اصلا. هتخسره مهما كان فى الاخر هو بيدور على مصلحته. و ثبات موقفه و شغله.

٤. نافذتى على العالم ..

ببساطه , موقع شخصى , تعرض عليه اعمالك و تواصل و حبه حجات عنك. تشتغل شويه على السوشيال ميديا , خصوصا المختصه بالمجال اللى انت منه. سواء مثلا دريبل , بيهانس , المهم ان العميل يشوفك قدامه كتير. خليك ظاهر. و اتعامل صح مع محركات البحث. مفيش حاجه تيجى بالساهل 😀

و كمان اعمل بلوج , استخدمها بشكل ما للترويج لنفسك فى مجالك سواء مبرمج او مصمم او ايا ما كنت. و ياريت متبقاش بلوج كوبى وبيست , علشان منظرك هيبقى وحش اوى.

٥. التنظيم ..

بص , انت حياتك كلها هتبقى بشكل مباشر للشغل. بمعنى , ان مفيش وقت راحه. بس فى وقت انا موش بشتغل فيه. انا بتابع فيه ! طبعا مفهمتش منى اى حاجه لانى انا نفسى مفهمتش من كلامى حاجه 😀

ببساطه. انا هحدد مثلا ٨ ساعات كل يوم هشتغل فيهم. شغل فعلى , هيبقى من الوركستيشن بتاعتى بالليل , بالصبح , بعد الضهر ! المهم انهم يبقوا فى وقت ثابت و ميتغيروش “اعمل خط وامشى عليه” ..

لكن الوقت اللى انا موش بشتغل فيه ؟ هعمل ايه ؟ الناس لازم تحس انى دايما موجود .. دى ميزه اياك تخسرها !

بسيطه , موبيلك الجميل فى جيبك , عليه ايميلك , سكايبك , اى حاجه تخص شغلك , و متاح ٢٤ ساعه. و اتشيك بس خمس دقايق كل ساعه , الموضوع بسيط اهو , و هتحسس الناس بفرق. لو رديت بكلمه. العميل موش محتاج اكتر من انه يحس انك موجود. بعدين هيعرف مواعيد شغلك , و هيبقى ظابط نفسه معاك.

٦. المسؤليه ..

الموضوع هنا نقطه رجوله موش اكتر. لو من النوع اللى ممكن يكبر دماغه حتى فى اتفه الحجات. نصيحه , بلاش تشتغل فرى لانس. انت موش هتستريح , و هتفشل , و سمعتك ممكن تضر كمان.

لما بتتعامل مع عميل. انت مسؤل عن الاتفاق اللى بينكم دا. و مسؤل عن انك تخرجله افضل حاجه ممكنه لخدمته. دا لازم يبقى قانون عندك , مفيش فيه ادنى فصال. لو موش هتقدر تعمل كده , يبقى الفرى لانسينج او الريموتلى , مسؤليه انت موش قدها.

٧. قوى قلبك ..

قوى قلبك فى اى حاجه و فى كل حاجه , بس بعقل. انت عارف امكانياتك , و عارف انت تقدر تقدم ايه بالظبط , و مين اللى ينفع معاهم اللى هتقدمه. استهدف دول , راسلهم من قبل ما يرسلوك مفيش مشكله , اعرض نفسك و شغلك , حاول تجمعهم , و توصل ليهم بشكل مباشر , و تشتغل معاهم .

اعمل فرصتك و متستناش الفرصه تجيلك , انت اللى هتصنعها !

متقبلش بشغل اقل , ولا شغل اكبر .. لا .. اشتغل فى مستواك , تحسن من نفسك , و ترفع نفسك خطوه لقدام .. واحده واحده , و لو جت فرصه لحاجه كبيره تقدر تتعامل معاها بسرعه , مفيش مشكله. كده هتحس بأريحيه فى الشغل , موش هتحس انك مخنوق و بتقول فين ايام الشركات 😀

٨. متقفش مكانك كتير ..

فى وسط يومك الزحمه دا . متنساش تتعلم حاجه جديده. و اياك تقف مكانك .. ابدع لاقصى درجه .. دا موش حاجه زياده ! لا .. دا الافتراضى اللى لازم يحصل.

بس ..

فى الغالب اه بس 😀 دى اغلب النقط اللى مسؤليتك كبيره فيها . او اغلب النقط اللى ممكن تخلى تجربتك فاشله. عن عده تجارب فاشله قبل كده. لو قدرت تتعامل مع دول من ٣ ل ٦ شهور , لو انت ماشى صح , تبقى عديت خلاص المرحله السيئه من العمل الحر.

 

اتمنى تكونوا استفدتوا ..

دمتم سالمين 🙂

المناقشة و النشر