دوشة حروف

التدخين الإلكترونى [VAPING] نقطة و من أول السطر

   -   2669

من بداية الموضوع كده , لو انت موش مدخن الاحسن انك متكملش قرايه فى البوست دا من الاساس .. وقتك اغلى منه 🙂 و ياريت متجيش فى يوم تقرأ بوست زى دا بسبب انك بقيت مدخن !!

ازيكم . ان شاء الله بخير دايما 🙂

الموضوع ملوش اى علاقه بالتقنية . لكن علشان المدخنين فى المجال عموما كتير “او قليل” بس انا منهم 🙂 فلازم اتكلم عن تجربه زى دى , فى الحقيقة انا مدخن شره جدا .. لو هنقول بالوقت اللى بقيت فيه مدخن رسميا , يبقى بقالى تقريبا ٨ او ٩ سنين .. بغض النظر عن اى كلام تقدر تقوله لمدخن علشان تقنعه انه يقلع عن التدخين .. و ان المدخن شخص ضيعف وبتاع ! ك مدخن اقدر اقولك سبتلك كل الباور اللى فى الكون عيش بيه .. الموضوع موضوع قرار .. انا قررت اكون مدخن ! فبقيت مدخن ! فى الاول و الاخير لو بضر فلنفسى و نفسى فقط .. الجزئية دى باعتبرها من الحريات اللى مينفعش نتناقش فيها 😀

فى نوع مدخنين كده .. واخدين الموضوع هوايه ! بيجربوا دايما ! نوع سجاير جديد ! طريقه جديده ! اى حاجه ! الموضوع بيقلب لشغف بعد فتره ! والنوع دا انا كنت منه 🙁

خلال الفتره الكامله اللى انا فيها مدخن الحمد لله معانتش بسبب التدخين الا بحاجتين ! الاثنى عشر .. و تأثير التدخين على القولون .. خصوصا انى برده شره فى شرب القهوه ! خلال الفتره اللى فاتت فى حجات كتير اتغيرت .. فحسيت انى المفروض احافظ شويه على صحتى .. و كرهت “ملحقات” التدخين بشكل او بأخر .. فكرت ابطل .. بس الموضوع ك عاده موش ادمان بقي مميز فى حياتى جدا بصراحه, و معنديش استعداد استغنى عنه ! حر !

المهم .. فكرت فى التدخين الالكترونى “وكان ك تجربه فقط” ..

و كان ليا اسباب مقنعه بصراحه !

  • ريحة لبسى ..
  • ريحة مكتبى
  • طفية السجاير المقرفه
  • نضافه اللاب توب
  • موش هقعد كل شويه اغسل سنانى بشكل قرب يخليها هى نفسها تبوش !
  • الاشخاص المحيطين بيا .. موش هيشموا حاجه معفنه !

كانت البدايه عن طريق jumia , عملت اوردر على EVOD و كانت تجربه خليتنى ادي الموضوع نفسه فرصه ! هى اه تجربه غشيمه شويتين .. بس كانت محفزه انى فعليا ابطل ادخن ..

تقريبا قعدت بعد ما وصلنى اوردر ال EVOD حوالى اسبوعين بستخدمها و كان الوضع رائع ..

بعدين بدأت تظهرلى مشاكل التدخين الالكترونى ..

  • الكويلز بتتحرق بشكل مبالغ فيه !
  • عمر البطاريه !
  • الليكويد متوفر ولا لا !

الموضوع موش لذيذ خالص ! و بسبب ان الحجات دى موش متوفره . رجعت ادخن تانى ! كان طعم السجاير فعليا زباله ! حاجه قمه فى القرف 🙁 و لانى كنت وقتها فى السعوديه “بعد ما عملت الاوردر بيومين تقريبا سافرت و معايا كمية محدوده من الليكويد و كذلك كنت اشتريت سيجاره امريكية ناسى اسمها من المطار برده م المنطقه الحرة” ملقيتش فى المملكه اى حاجه 🙁 و بعدها بفتره لقيت حاجه متوفره و كانت EGO و كان الليكويد اقل ما يقال عنه انه “زبالة” حرفيا 🙁

 

رجعت بعدها بفتره لمصر , و فى مصر قررت انى هشترى بقى حاجه تعيش اكتر , عمر البطاريه يكون كويس , و الليكويد كده كده متوفر و الكويلز تكون محترمه .. فجبت istick 30w و جبت aspire nautlies و جبت ليكويد برده و عملت اوردر على ليكويدز تانيه .. و جبت لل aspire كويلز احتياطى ..

و فى الوقت دا اكتشفت المشاكل الجديده 🙁

  • التانك الازاز ! ممكن يتكسر بسهوله 🙁 وانا معنديش replacement للاجزاء دى 🙁
  • الكويلز هتفضل طول عمرها مشكله ! لازم فكره الكويلز نفسها تتغير 🙁
  • الليكويد .. هاجيبه يكفينى شهر ! موش هقعد اعمل كل كام يوم اوردر !!! و اثبت النوع و تركيز النيكوتين .. الموضوع بيأثر على الضغط !

حليت المشكله وقتها بأنى اشتريت فعلا ليكويد يكفى شهر .. و جبت تانك اسبير تانى “الحجم مختلف , الاول كان الحجم الكبير , الجديد mini” وجبت معاه ريبليس للازاز , و جبت برده شيتين كويلز ! كده كويس اوى ! هيا بنا نمرح بقى 😀

شهر ! اه تقريبا شهر .. فضل الوضع ممتاز , بغير الكويلز , و معايا الازاز , و ال istick جميله بصراحه و بتقعد يوم او يوم و نص ! الحياة حلوه .. و فجأه ! الكويلز خلصت .. و قعدت ادور .. و فى الاخير لقيت انى معايا مثلا يومين على ما احضر حاجه منهم .. وانا بكره اصلا فكره الكويلز .. و برده ال istick بدأت احس انها ضعيفه !!! و بدأت افكر هو هيحصل ايه لو البطاريه باظت وانا عاوز اغيرها ؟؟

المهم .. فى الاخر اشتريت الكيت الاخير .. و اللى موش ناوى اغيره بصراحه . كل حاجه وحشه اختفت تماما 🙂 كان حل نهائى جيد 🙂 ممكن يتطور فى المستقبل ! لكن لو حتى متطورش .. الوضع حاليا ممتاز , لو اتطور هيبقى شئ من الرفاهية موش اكتر ..

الكيت الاخيرة كانت SX MINI و SubTank MINI .. بس دول عرفونى فعلا ايه اللى محتاج انت ك مدخن . مقبل على التدخين الالكترونى انك تعرفه 🙂 ركز بس فى اللى جاى …

السجارة نفسها .. او ادواتك .. بتبقى كهربا .. و ليكويد , و قطنه !

الكهربا هى البطاريه .. و الليكويد ! هو الليكويد يعنى ملوش اسم تانى .. و القطنه هى الكويلز .. انت محتاج ان الحجات التلاته دول .. او على الاقل الاولى و الاخيرة منهم يبقى فى ايدك انك تبنيهم من تانى فى اى وقت .. قبل ما تبدأ تدخين الكترونى حط كل النقط الجايه دى فى دماغك و اعصرها كويس اوى اوى اوى ..

خلى بالك بقى !

  1. البطاريه .. هات حاجه ينفع تغير فيها البطارية , اسمها MOD BOX و فى انواع كتير .. شوف ريفيوهات ليهم على يوتيوب و قرر انت عاوز ايه .. و متشغلش بالك هى بتطلع كام وات “كبيرك هتشتغل على ٤٠ ! و موش كل الوقت” بس اشغل بالك هى ممكن تقعد معاك كام ..
  2. التانك .. لازم يبقى ريبلدابل .. ودا معناه , انك انت بتستخدم كانتال , و قطن اورجانيك .. و بتبنى الكويلز بنفسك , من غير ما تحتاج تشترى .. و يستحسن .. ان يكون التانك ينفع تشترى ليه كويلز جاهزه , و ينفع تبنى الكويلز بتاعته بأيدك .. دا بيديك حريه اكتر .. و هيريحك من مواقف كتير انت موش هتحب انها تحصل 🙂
  3. الليكويد .. انواع كتير جدا هتلاقيها .. يعنى هتلاقى برميوم “دا بيبقى مبالغ فى سعره” و هتلاقى حجات بتنزلها شركات زى Liqua و هتلاقى DIY و دى بتبقى ليكويد حد عملها بنفسه ! و فى ناس بتبيعها , موش مشكله انت هتشرب ليكويد نوعه ايه , دى حريتك , بس اللى تفكر فيه , هل هتلقاه بسهوله ؟ هل متوفر و ثابت فى جودته ؟؟ ولازم تجرب الاول كذا نوع , بعدين اعرف انت عاوز ايه .. و فكر فى الاخطار الصحية للحاجه اللى انت موش واثق فيها .. لازم تبقى متأكد انه مفيش فيه اى مشاكل صحية ..
  4. الشكل الخارجى .. ك مصمم .. انا بهتم جدا بشكل القطع .. لما تشترى تانك , و تشترى mod حاول تشوفهم الاتنين و هما راكبين سوا .. هل متناسقين ! ولا لا .. و قرر .. ادى المظهر الجمالى اهتمام شوية ..

نيجى بقى لحاجه اخيرة .. هل الموضوع مكلف اكتر من السجاير العاديه ؟؟

بالنسبه ليا الموضوع كان موفر .. يعنى انا كنت بشرب فى اليوم علبتين او علبه ونص تقريبا , كنت بدخن مالبورو احمر ! يعنى كان خراب بيوت و تدمير منظم للصحة ! حاليا فى اقصى الاحوال انا بصرف نص اللى كنت بصرفه على التدخين ..

طيب هل الموضوع مضر صحيا ؟؟

اولا .. مفيش حاجه اسمه مية على الرئه بسبب التدخين الالكترونى .. دا قريته فى حتت كتير جدا و مع شرح اثبت تفاهة اللى بيقول كده .. بس الموضوع موش معروف اثره على المدى البعيد .. و اقدر اقولك انك لازم تتابع الجديد لان كل يوم بتحصل ابحاث عن الموضوع دا .. الموضوع لسه بيتطور ..

طيب اخيرا .. ايه الاماكن اللى ممكن تفيدنى ؟؟

انا اتخبطت كتير جدا , بس فى الاخر .. بدأت توضح الرؤيا تماما بعد ما لقيت جروب على فيسبوك , اسمة مطورى التدخين الالكترونى .. الجروب بصراحه ممتاز .. هتلاقى فيه بيع و شرا و افكار و نقاشات كلها هتكون مفيده ليك .. تقدر تشوفه من هنا .. 

 

اخيرا .. انا حبيت اشارك اخوانا “المدخنين” تجربتى فى الموضوع دا لاى حد بيفكر يحول ليه .. يارب تكون فادتك .. و نشوفك مبطل تدخين خالص اصلا !

دمتم سالمين 🙂

 

المناقشة و النشر