دوشة حروف

إعترافات 10 سنين شغل!

   -   1582

السلام عليكم , إن شاء الله تكونو بخير دايما ☺

من العنوان و علشان ندخل فى الموضوع على طول , دى أهم حجات لازم اعترف بيها بعد 10 سنين شغل فى المجال دا 😆

  1. نص البدايه معايا كانت تحريف الواقع, بمعنى , انى تعبت جدا فى بدايه مشوارى فى المجال دا , و علشان اقدر نفسيا استحمل الضغط اللى كنت فيه كنت بحرف كتير جدا فى الواقع “بكذب على نفسى و بصدق كذبتى كمان!” و كان صحابى بيساعدونى جدا فى الموضوع دا بكلامهم عن شغلى و اعجابهم بيه خصوصا انى كنت بعمل حجات زفت و كانو بيقولولى جميل و ابدع و كانوا فعلا واقفين جمبى ع الاقل بكلامهم فى بدايتى و مازالو , خصوصا عمرو محمد و مصطفى جمال 😍 و كل حاجه فى الواقع كنت بحرفها , الحمد لله كنت بحققها بعدها بفتره موش كبيره.
  2. كنت مشوش جدا جدا فى بدايتى و خصوصا فى مرحله الثانويه العامة و مكنش التصميم اصلا اهتمامى من الاساس, و كنت مهتم بالبرمجه بشكل كبير جدا.
  3.    بدايه تعاملى مع فوتوشوب كانت على ايد صديق عزيز جدا عليا و هفضل اقول عليه استاذى لحد اخر يوم فى عمرى و هو محمد علاء 😘 , و اكتر صاحب فادنى جدا و سهل طريقى فى الويب كان عبد الفتاح احمد مطور مجنون و من اكتر الناس اللى وصلت شغلى للناس هو دى جى يحيى , حبيبى يحيي حسان 😘
  4. اول ما بدأت خالص , و يمكن قبل ال 10 سنين دول , كنت جرافيك ديزينر وبس ! انا مدخلتش مجال الويب بشكل عام الا علشان اعمل لنفسى ويب سايت اعرض عليه شغل الجرافيك الخاص بيا !
  5.  اهلى فى بدايه شغلى و تحديدا والدتى , كنت باخد منها تمن حجز دومين و الاستضافه و الكلام دا , و فوق دا كله كنت سبب ازعاج كبير جدا فى البيت و مكنتش فتره مراهقتى سهله ابدا على اى حد يعرفنى , و اخص جدا والدتى تعبت جدا معايا , الله يباركلى فيها 😍!
  6. والدى قبل الكليه كان عاوز يدخلنى كليه شرطه , حربية او جويه , و اختبرت كل اختبارات جويه و قبلت و قطعت كارنيه التردد و رميته فى الحمام بعدها و قولتلهم انى سقطت فى الاختبارات و اتقفشت بعدها بنص ساعه و اتعمل عليا حفله جميله منهم فى القاهره , بس كنت عملت اللى انا عاوزه.
  7. رغم انى كنت رافض انى ادخل كليه خاصه و شايفه شئ من الفشل او الاعتراف بالفشل ! إلا انى ساومت والدى الله يرحمه على انى ادخل حقوق بدل ما ادخل كليه خاصة فى مقابل انه يجهزلى مساحه عمل بالاجهزه اللى محتاجها علشان “هوايتى” و اقتنع وقتها و دا السبب الوحيد اللى خلانى دخلت حقوق اصلا.
  8.   اكتر بنى ادم فى المجال كان بيدينى حافز انى اشتغل من خلال متابعتى ليه كان كولين سميث و اكتر مصمم اتمنيت اوصل لإمكانياته كان الرائع رفايل او فاريل.
  9. فى مجال الجرافيك , إستغليت شعبيه بعض الفنانيين فى انى اوصل شغلى للناس ! بصراحه الموضوع كان كما السحر فى وقتها!
  10. بدايه شغلى مع شركات , كانت مع شركات تحت بير السلم , و مستحملتش بصراحه لانى كنت بشوف كميه سوء حظ غير طبيعيه , و علشان كده بدأت اعمل مشاريع خاصه بيا و فشلت الحمد لله فى 3 مشاريع هما “البتول تخصصها طبعا و دعايه و اعلان – بعدها Special Effect و كان تخصصها دعايه و اعلان و ويب – و بعدها 8Media و كان تخصصها برده دعايه و اعلان و ويب.
  11. لما بدأت إيت ميديا كانت خبرتى فى مجال الويب فعليا “بلح” لكن مع مرور الوقت كنت بدأت اكون كويس شويه , و بسبب قله الشغل و تأخير تسليم المشروعات القديمة مكنش قصادى الا انى اقفلها.
  12. اول شركه اشتغلت فيها بعد إيت ميديا انا دخلتها وانا تقييمى لنفسى صفر , برغم كده الحمد لله , بالارقام انا نجحت جدا فى انى اعمل اسم لنفسى بسرعه و فى وقت بسيط جدا و فى نفس الوقت افيد الشركه اللى انا فيها.
  13. اول شركه اشتغلت فيها يوم ما جالى رد على السى فى و انهم موافقين يعينونى , قولت لاهلى انى هروح اشتغل هناك لانى هشتغل فى شركه سرمدى بعد سنتين من دلوقتى و محتاج اجهز نفسى لدا!
  14. استقلت من اول شركه اشتغلت فيها قبل ما يتوافق على شغلى فى شركه سرمدى, و اعترف ان سرمدى كانت اول شركه اسقط فيها فى مقابلات الموارد البشريه و منساش انى فى الاختبارات التيكنيكال انا نسيت مثلا ال Personas ! رغم انى شرحتها بس نسيت فعلا كلمه Personas مكنتش مجمع نهائيا!
  15. انا عمرى فى حياتى ما نجحت فى اختبار HR اصلا.
  16. رغم حبى الكبير جدا لشركه سرمدى إلا انى وقت ما اشتغلت فيها مكنش فى اى نيه جوايا انى اكمل جواها اكتر من سنه ك حد اقصى.
  17.  سرمدى كانت بالنسبه ليا نقله مختلفه تماما على المستوى الشخصى ك تفيكر و شخصيه و كذلك على مستوى العمل و المهارات اللى اتعرفت على الاقل عليها من خلال فريق عملها.
  18. لما قدمت استقاله فى سرمدى انا مكنش فى شغل او اوفر معروض عليا اصلا , و اتصلت بأهلى قولتلهم انى استقلت من سرمدى علشان فى اوفر تانى جاى من شركه تبع الراجحى!
  19. اقسم انى بعد ما قفلت المكالمه مع اهلى بنص ساعه اتصل بيا مدير شركه ويرلس ماركتر أ-عبدالله الجرو , و قدملى اوفر , و الشركه كانت تبع الراجحى ! الغريب , إنى مكنتش مقدم سى فى فى الوقت دا فى اى شركه!
  20.  وفاة والدى رغم انى كنت عارف انها هتحصل لا محال قبلها بشهور , إلا ان وقت ما حصلت لغبطط حياتى بالكامل و مازلت لحد النهارده موش عارف اتعامل مع الامور زى الاول بطريقه سهله, الأسواء من كده , إنه كبرنى بشكل غبى و بسرعه , دا خلانى اشوف و اقيم نفسى من بره ك بشر , صعب جدا تتعامل مع نفسك وانت واثق انك بنى ادم منحرف و غير سوى بالمره ! بل فى اوقات انت قنبله بتنفجر فى اللى حواليها كتير جدا! للحظه اللى بكتب فيها البلوج دى انا بكل صراحه بينى وبين نفسى فى شخصين مختلفين تماما , مقدرش اقول عليهم جزء خير و جزء شر ! اقدر اوصفهم بشخصيين منفصلين تماما كل واحد له قناعاته اللى صعب تتوافق مع قناعات الاخر, شخصيه زى كده صعب تتحمل تكون قريب منها لان تقلباتها متقدرش تعرفها هتحصل إمتى ولا فين ! بس بكل صدق , ربنا رازقنى بأصحاب انا معرفش هما بيحبونى ليه اصلا! عمر محمد و سامح عاطف و محمد طه  و محمد ابراهيم و إسلام يسرى و إيمان أحمد 😍 من اكتر الناس اللى مدين ليهم بالشكر و اسف لو سببت ليكم شئ سئ فى اى وقت , كل الشكر بصراحه.
  21. خلال فتره شغلى بشكل عام , لما كنت بحتاج ادخل مجال ما ويجيلى فيه شغل , كنت ببدأ ب كونسبت موش اكتر , اغلب الشغل اللى كان فى بدايه شغلى فى المجال مكنش لعملاء فعليين من الاساس.
  22. بيكسفار, انا واحد من اكبر الاسباب اللى خلتها متكملش فى طريقها بالشكل الصح بسبب قرارات كتير غلط, لانى افشل مدير فى الكون! بس فى يوم هتتعوض …
  23. إمكان واحده من اكتر الشركات اللى اتعلمت فيها , و إذا سألتنى عن ايه اللى اتعلمته وانت فى إمكان هقولك بمنتهى الصراحه 50% من معرفتى هى من خلال مشاريع إمكان.
  24. فى يوم فكرت اسيب إمكان و كان فى سببين , الأول انى فعليا موش الشخص اللى بيتحمل ضغط نفسى على فتره طويله , فى الغالب بترك ! و تانى سبب إنى كنت فعلا عاوز اتعلم اكتر فى مكان متخصص اكتر.
  25. إمكان الشركه الوحيده اللى قدمت فيها استقاله و استقلت اكتر من شهرين و بعدين رجعت اشتغلت فيها تانى, و موش فاهم سبب دا لانى عمرى ما اخدت قرار و رجعت فيه لكن الموضوع كان مكالمه اقل من 20 دقيقه!
  26. حاليا , انا بفكر فى ايه اجمل طريقه انهى بيها مشوارى العملى فى المجال دا و ايه ممكن اعمله بعد ما ابطل اشتغل فى المجال دا.

دول كانو 26 اعتراف , لل 26 سنه اللى قربوا يكملوا.

مقدرش اقولك اى حاجه تفيدك إلا إنك اوعى ترسم حلم له نهايه واضحه , فكر بس فى الخطوه الجايه. و الخطوه اللى بعدها , لكن اكتر من كده متفكرش .. اوعى تقول فى يوم إنك هتوصل لحلمك لما تعمل كذا. لانك وقت ما تعمله هتحس ان حياتك انتهت تقريبا ! و هتبقى موش عارف تكمل من بعدها. الحياة متغيره و سريعه جدا , اسرع مما تتوقع , و هتعدى هوا ! فحاول تعيش فعليا وانت بتحقق حلمك أيا ما كان , و متقعدش تدور على الحياه , لان اللى انت بتدور عليه ما هو الا الطريق اللى انت ماشيه دلوقتى موش اكتر ولا أقل!

متستناش الحظ , و حاول تغير نظرتك ليه شويه , لان التطبيق العملى لكلمه حظ فى المجال العملى , هو انك تعبت فشخ ف بشكل ما اشخاص اصحاب قرارت مؤثره على نفس الكوكب عرفوا بتعبك , فقرروا يستفيدوا من تعبك. لو عاوز تكون محظوظ فى الشغل ! خليك مزعج .. بس بطريقه جميله و لطيفه , و خليك متواضع جدا , لانك اقل من انك متكونش متواضع اصلا ! فأيا ما كنت انت ولا شئ. و الاهم و الاهم حاول تتخيل سناريهوات الحظ اللى ممكن تحصلك , و نفذها انت , و حط نفسك فى المكان الصح , فى الوقت الصح, الموضوع سحرى!

يمكن 26 اعتراف متلغبط ! يمكن ميكونش مفيد لناس كتير , بس كلى ثقه , إن فى ناس لو قليلين هيستفيدوا منه.

اشوفكم على خير , دمتم سالمين 😍


Also published on Medium.

المناقشة و النشر