دوشة حروف

إصنع منتج مميز اليوم!

   -   636

السلام عليكم , إن شاء الله تكونوا دايما بخير 🙂

الكلام فى البوست ممكن يكون عام شويه , بس هيفيد بأذن الله. ٩٩٪ من المتابعين , مجال شغلهم ليه علاقه قويه بمجال شغلى. من خلال البوست دا انا بتكلم على بعض النقط اللى فى الغالب بنغفلها واحنا شغالين لاسباب كتير سواء تعب او او او … انا نفسى اوقات بغفلها , بس لما برجع اعمل النقط دى بحس بفرق فى جوده الشغل كبيرة جدا. فى النقط الجايه توضيح لاغلب الحجات المهمه اللى ممكن تنساها  , او تعلمها بس موش بالطريقه الصح.

١. افهم البروجيكت :

اغبى حاجه ممكن تعملها فى حياتك انك تتسرع فى النقطه دى .. انا فاهم اللى انت عاوزه ! .. دى جمله بتعبر عن مدى هبلك لو قولتها فى خلال اول ربع ساعه من اى بروجيكت! بص عاوز اقولك انك بيبقى منظرك زباله 😀 لان ببساطه اللى قدامك لسه مخلصش كلام ! فهمت البروجيكت انت منين يا فطن ؟؟ لا و لما تيجى فى نص البروجيكت حاجه موش فاهمها ! الموضوع هيبقى رخم. ادى نفسك فرصه دايما تفهم البروجيكت. و للاسف , انا مقصدش الفهم العام للبروجيكت, هعملك قائمه صغيرة كده , وانت قاعد فى اى ميتينج لبروجيكت .. وقت ما تجمع النقط دى بشكل “وافى” ولاحظ كلمه وافى دى اقصد بيها اهتمامك بالتفاصيل. وقتها قول انك فهمت البروجيكت :

  • فكره عامة عن البروجيكت
  • الهدف من البروجيكت
  • الكونتنت الملك !
  • المستخدمين المستهدفين
  • البروجكيتس المنافسة
  • القيمة المادية او budget البروجيكت
  • فريق البروجيكت

تعالو نخلى الموضوع منطقى فى كام نقطه. الفكره العامه عن البروجيكت هتخلي خيالك يفتح بيبانه على باقى الافكار , من غير مناقشه. هتبقى مستعد للى جاى. مع التعمق اكتر فى المناقشه. هتلاقى نفسك بتتكلم.

الهدف من البروجيكت دا بيحددلك ببساطه خط النهايه! اوعى يوم من الايام تدخل بروجيكت موش عارف نهايته. كابوس! صدقنى كاااااابوووووووس!!!  لازم تعرف انت عاوز توصل لفين علشان تعرف ازاى هتوصل و تحضر ادواتك و تفهم اكتر الدنيا فيها ايه بالكامل.

الملك , هو المحتوى ! الجمله دى حطها دايما فى بالك. و متخلطش الفكره مع إداره المحتوى! الموضوع مختلف تماما. ببساطه انا لما بتكلم على المحتوى. بتكلم حتى عن موقع تسويقى لمنتج. محتواه هيكون ايه ؟ ك كلام حتى موش عناصر بس ! الموضوع هيختلف. يعنى فى حد فاهم ممكن يكتب كلمتين فقط كفيلين ببيع اى منتج! و فى كلام كتير هرى موش هيوصل للفكره او الهدف.

المستخدمين المستهدفين لازم تبقى فاهم هما مين , وليه ! و هل هما فعلا مهتمين او لا ! درجه اهتمامهم .. النقطه دى انا موش بتكلم على UX انا بتكلم على بيزنس .. مدى نجاح البيزنس او حاجه الناس ليه. بيحدد دايما مدى صعوبه المهمة عليك. يعنى مثلا لما تيجى تشتغل على موقع تعليمى. لو معرفتش مستخدمينك كويس و قد ايه محتاجين الكونتنت دا .. انت هتفشل فشل ملوش حل ! هتاخد بطل العالم فى الفشل !!

البروجيكتس المنافسه. دايما انت هدفك انك تطلع لقدام. كمل من مكان ما انتهى اللى قبلك. متبدأش من جديد. دا اللى بيحصل لما تعرف المنافسين بشكل كويس. بتفهم هما وصلوا لايه . و بتفهم هما ليه وصلوا للنطقه دى, بتعرف نقط الضعف و تقويها و تعرف نقط القوه و تعلى عليها!

القيمة المادية. فكر بعقلانيه فى اى بروجيكت. بلاش فيلم احاسيس اللى بينزل ع التتر دا ! ملوش قيمه. فايده انك تعرف القميه المادية للبروجيكت , مع معرفتك لهدفه. بيحدد مدى نجاح مهمتك و صعوبتها. يعنى تعالى ناخد مثال بسيط. انا عاوز اعمل موقع سوشيال اسلامى ! جميل جدا . شوفت بقى تتر احاسيس اللى نزل ؟؟ شايف قد ايه الموضوع جميل ؟؟ طيب البادجيت بتاعته ٥٠ الف جنيه مصرى “مثلا” .. فى موقع زى دا. لو الهدف منه انه ينجح خلال سنه. يبقى اللى شغالين على المشروع بياخدوا ادويه عظام علشان انا مجربها و عارف الدماغ بتاعتها :D. لو فكرت ان برمجه وتصميم المشروع موش هتاخد يا سيدى اكتر من ٣٠ الف “ودا معناه ان المشروع محدش اشتغل عليه بروفيشيونال بمعنى الكلمه” هل ٢٠ الف جنيه كافية لحمله اعلانيه توصل للهدف ؟؟

فريق البروجيكت .. حاجه واحده بتفرق كتير جدا فى معادلة النجاح من ناحيه القيمه الماديه. هى فريق العمل , يعنى لما تلاقى ناس بروفيشيونال بس مفيش ماديات عاليه. دا بيعلى قيمه المشروع نفسه. الناس اللى فيه. لانهم هيفكروا و يعملوا الصح بالمتاح. اما لو الفريق موش بروفيشيونال , و قيمه ماديه منخفضه. فالعكس فى الغالب.

٢. البحث = الصبر ..

النقطه اللى فاتت , تقريبا خليتك ملم بحجات كتير فى المشروع. كويس جدا , بس دا موش كفايه. نقطه البحث بحسها اكتر النقط المظلومه معانا ! احنا بنستخسر نبحث , او بمعنى ادق , بنندفع ناحيه الشغل. ودا شئ طفولى. مينفعش!

كل ما بتبحث اكتر ورا كل نقطه انت فهمتها. كل ما بتقدر تكون ملم بيها اكتر. و كل ما بتقدر تطلع شئ مميز اكتر و اكتر فى النقطه دى. المعرفة كنز لازم تدور عليه و تكتسبه بأى طريقه. كل ما بتبحث اكتر بتعرف تعمل الحاجه بشكل افضل.

يعنى لو هبحث عن الاهداف الخاصه بالبروجيكت و ادور على المنافسين و افهم اكتر المستخدم. دا كله بيحدد ايه المطلوب منى. و مدى صعوبه البروجيكت و ايه اللى لازم اوصله ! اكتر فكره عبقريه فى تاريخ البشرية كانت محركات البحث. و تانى اكتر فكره عبقرية كانت البحث الداخلى فى المواقع. حاول تكون صديق للاتنين دول. تعرف تستخدمهم و توظفهم لخدمتك صح و صح الصح كمان. هيفرق كتير جدا فى انتاجك.

٣. ابرز شخصيتك :

اقتناع تام عندى. ان مهما كان ايه اللى بتعمله. لو مفيش فيه شخصيتك. يبقى انت معملتش حاجه! كل حد فينا المفروض يتعامل مع شغله بحيث يخرجه زى بصمه صباع ايده. متبقاش مقلد ولا Technology Follower لان دا بيكلفك كتير جدا. يعنى انت دلوقتى قصادتك ترندز كتير جدا. هتشتغل بأى حاجه فيها موش دى المشكله , المشكله انك تبقى تابع , موش قائد. هنا لازم تظهر شخصيتك. مثلا قصادك كميه تقنيات النهارده تحتار فى ايه ولا ايه ! هتستخدم اى حاجه ايا ما كانت ضيف فيها لمستك انت.

موضوع الشخصيه دا بيفرق كتير جدا على المدى البعيد. هتكون وجهة نظر و رؤية ما. هتخليك تشتغل بأى حاجه فى العالم سواء تريند او تكنولوجى و فى نفس الوقت تضيف ليها جوانب ناقصه. يمكن الاول الموضوع ياخد وقت شويه. بس بعدين الموضوع بيبقى سريع و شبه تلقائى ! حاجه فى فطرتك حاول تنفض من عليها التراب.

٤. الريفيو :

الريفيو , او مراجعه الشغل. حاجه مهمة جدا , و الاهم انك تبقى عارف امتى شغلك ينفع يتعمل ليه ريفيو. وانت شغال , وصولك لمرحله رضاك التام عن الشغل فى اللحظه دى بعد مراجعتك ليه مره او اتنين بتعنى للناس حواليك جوده شغلك. علشان يبقى شغلك جودته اعلى , لازم الريفيو اللى يطلع من تحت ايدك يبقى الكومنتس عليه اقل , بل منعدم فى بعض الاحيان.

الجزئية دى بتطلب التركيز جدا. افتكر دايما و انت بتراجع قبل ما توصل لمرحله الريفيو , ان جوده الشغل اهم بكتير جدا من الشغل نفسه. اى حاجه جميله و رائعه و رهيبه جمب جودته شغلك تساوى صفر. اشتغل و اتعب و طلع عينك ! و فى الاخر جوده شغلك فى الجزئية دى ممكن تضيعلك كل تعب على الفاضى. مجهود من غير توظيف صح.

دى نقطة بتفرق كتير جدا فى مواقف كتير جدا و تبرجح كفة ناس عن ناس. النقطه دى بتجهد اى فريق عمل. يعنى المطلوب من فريق العمل هو انتاج شغله بالجوده الافضل. بحيث انه يبدء يبدع بعد ما خلاص اسس القاعده الجيده. لكن لما بيحصل ان الريفيو يبقى مجهد. بتلاقى شغل اى كيان مجرد وصوله لمقبول و شكرا. ضيف قيمه بشكل صحيح. وظف امكانياتك بشكل افضل و احترم جدا شغلك. و خليك مقتنع ان اى تعليق على شغلك هو بيعنى انك معملتوش صح و دا بيعنى بشكل مباشر تقصير منك موش اكتر ولا اقل.

٥. إعرف حجمك :

النقطة دى عامة شويه فى الشغل , بس بتفرق على مستوى المشاريع بشكل كبير جدا. اللى اقصده موش تواضع و بتاع و جو الحكم الرخيص دا. اللى اقصده , انت حجمك قد ايه فى البروجيكت ؟ هل انت محقق المطلوب ؟ مفيش احسن ؟؟ هل انت ابدعت فعلا ؟؟ فين الجديد على الكون اللى اضفته ؟؟ مفيش ؟؟ فى ؟؟ طب قد ايه ؟؟ مبنى على ايه ؟؟ هل مفيش بناء احسن ؟؟ طيب مفيش اساس احسن ؟؟ موش ليك للبروجيكت ؟؟

دى كلها حجات هتخليك تشوف الموضوع بشكل اوضح و احسن. هيخلى انتاجك يعلى , بالتالى قيمتك او حجمك فى البروجيكت هتعلى , و وقتها اعمل اللى اتربيت عليه ! دا موش بوست موضوعه الاخلاق خالص 😀

٦. رأى المتخصصين :

خليك غيور على شغلك. و غيرتك على شغلك دى لو موش نتيجتها انك تطلع شئ ممتاز. يبقى انت بتهرج مع نفسك هزار بايخ و تقيل. تعالى نفرق بين حاجتين شبه بعض فى البوست هنا. الريفيو , و دا هيديهولك العميل او التيم ليدر او حد من جوه البروجيكت نفسه مسؤل عنه. اما رأى المختص هنا فأقصد بيه رأى حد فاهم بعيد عن الدايره دى و قبلها يستحسن , حد يكون فاهم هيديك تعليق يبنى موش حد هيقولك “بارك الله فيك !” ولا “شغل جميل ما شاء الله” التعليقات السطحيه الغير مفيده بالمره. و اللى بنفرح بيها من عموم الناس. بس اللى اقصده انك تختار شخص او اتنين او تلاته , واثق فى ثقافتهم و معرفتهم بالمجال و يكونوا من جواه و يدوك نصايح. دا صدقنى احسن بكتير من ان حد يقولك “يخرب بيت جمال شغل معاليك” و يبقى فى الاخر بينفخ فيك لحد ما تفرقع 😀

٧. اللى انت شايفه صح :

شوف يا مؤمن , لسه قايلك ريفيوا و رأى المختص ! و بقولك اللى انت شايفه صح ؟؟ اه , ماهو صاحب البروجيكت اللى هيطلع بأسمه انت فى الاخر. فلو موش مقتنع اقتناع تام بأى حاجه متعملهاش. حتى لو دا هيكون سبب انك تسيب مكان و لا تقدم استقالتك من وظيفه !!! متعملش غير اللى انت شايفه صح وبس.

موش بقصد هنا انك تعاند و تصر على رأيك . بالعكس انا عاوزك متفتح جدا. بس متفتح بيفكر , موش “حزب تمام و اللى تشوفه” ! لانك كده إمعة و اقصى ما تكون فا انت زيك زى اله كاتبه بترجم افكار حد تانى , حتى لو الكون كله موش عارف دا. بس صراحتك مع نفسك فى يوم م الايام هتحسسك انك ولا شئ. خليك مقدر نفسك صح , و استعمل نعمة العقل شويه. ربنا يكرمنا و يكرمك امين يارب <3

8. الاستمتاع قبل الإنجاز :

نقطه مهمة جدا جدا جدا , طريقة تفكيرك فى الشغل نفسه هتحدد كتير من النتيجة. انت باصص للموضوع انجاز ؟؟ عاوز تكسر رقم قياسى حضرتك ولا فى جلاد بيجرى وراك ؟؟ ايا ما كان مدى ايمانك و مجهودك لو بتفكر فى الانجاز هتطلع بحاجه اقل ما يقال عنها “مرقعه” , فكر الاول , فى الاستمتاع بشغلك , قمة الاستمتاع , انك تخرج شئ جديد عن العالم , بصراحه وقتها بس شخصيا بحس انى عملت حاجه. فكر بالطريقة دى. هتفرق كتير فى جودة شغلك.

 

لحد هنا انا عقلى وقف عن التفكير , يعنى موش شايف نقط تانيه ممكن تفيدك فى انتاجك مشروع مميز بدرجه كبيره على الاقل , اتمنى تكونوا استفدوا.

دمتم سالمين 🙂

 

المناقشة و النشر