دوشة حروف

أهم كام حاجه تتعلمهم فى الدنيا

   -   742

السلام عليكم , إن شاء الله تكونو بخير 🙂 و عيد سعيد عليكم جميعا <3

البوست باين من عنوانه .. أهم كام حاجه “محددتش رقم” تتعلمهم فى الدنيا. حياتك نفسها , طريقتك فى التفكير , حجات ممكن تكون قدامك موش شايفها , بس بعد فتره هتلاحظ مدى التأثير اللى عملته. من غير كلام كتير , نبدأ ..

١. لا نبالة فى الفشل :

انا فاشل أه , بس نبيل .. انا نبيل أه , بس فاشل .. حاسس ان الجملتين اللى قدام دول مفيدين ؟ منطقيين بالنسبه ليك ؟؟ حبيت قبل كده اصلا تفسر معنى الفشل ؟

اولا الفشل اللى بتكلم عليه هنا , هو الفشل المحض , او بمعنى ادق , الفشل اللى موش بيودى للنجاح , او بمعنى اخر , انى موش بتكلم عن الفشل فى خطوه ما على طريق .. لا .. انت فاشل من غير طريق اصلا ..

ثانيا , و دا الاهم , الفشل اللى بنتكلم عليه , وصفه الدقيق و الملائم من وجهه نظرى : إنه عباره عن إنسان قرر ميوقفش جمب نفسه و يتخلى عنها. هل دا فيه اى نبالة ؟؟ دانت كده مع نفسك ! امال مع الناس هتبقى ايه ؟ ازاى هتأثر فى اللى حواليك اصلا !!!!!

فى الجزء دا خصوصا .. موش عاوز اسمع الناس بتاعه انا اكتشف اربع طرق للفشل ! اه اللى بتقوله فعلا صح 🙂 انت برنس !

بس هل انت عارف امتى الموضوع دا بينطبق عليك و بيكون ايجابى ؟؟ وقت ما تبقى محدد هدف , و بتحاول بكل طاقتك توصله و بتحوش اى معوقات قدامك مهما كانت قوتها.

الفشل , من شخص غير نبيل ممكن يشوف نفسه نبيل , حوالينا فى كل مكان .. الشماعات لا حصر لها .. و اى شماعه منهم , حاول تبص لتفاصيلها .. شايف النبالة جواها ؟؟ دا فشل محض. فشل من غير ادنى نتيجه .. او على الاقل .. هو فشل لحد دلوقتى محض , و من غير ادنى نتيجه , لحين استفاقه صاحبه من الغيبوبه 🙂

٢. اليتيــــــــم :

اليتيم عمره ما كان ابن او بنت طلعوا ملقوش أب .. ولا كبروا و ابوهم ربنا تولاه برحمته , الموضوع موش كده خالص ..

اليتم الحقيقى , بيبان فى اب مرسخش قواعد مبهره فى شخصيه ولاده من غير ما يعلمهالم .. لا لمجرد كونه اب قدر يبين لولاده قد ايه هو مميز فى حجات معينه , حتى لو كان فى جوانب سلبيه فيه .. بس ولاده عرفوا يتعلموا منه حاجه تكون سبب فى نجاحهم فى المستقبل ..

شخصيا , انا بحمد ربنا على والدى “الله يرحمه” بغض النظر عن اى ظروف شخصيه او أسريه او او او .. بس والدى العزيز كان واحد من اهم الاسباب اللى بنيت عليها تصورى لحياتى فى المستقبل. كان مميز جدا جدا .. فى شغله , فى الكاريزما الخاصه بيه وسط الناس , فى مظهره , فى تاريخه الشخصى ! دا زرع فيا فكره انى ابن الشخص دا .. و الوحيد كمان ! فأكيد كل الجينات دى ملهاش مكان غيرى .. خلانى موقن انى هكون على صوره افضل منه .. و خلانى اتعلم من اخطاءه , وان كنت كررت اغلبها لحد دلوقتى .. الا إنى مازلت فخور بتاثرى بيه 🙂

ربنا يرحمه , و يجعلنا جميعا , أب او أم , مؤثرين فى اولادنا فى المستقبل بشكل يخلى حياتهم افضل.

٣. إنت بوابه أرزاق متحركه :

فى يوم من الايام , انت سافرت من بلدك لبلد تانيه , اشتريت من على بعد ٣٠ ميل من بيتك مياه معدنيه , و بعدها اديت لراجل غلبان كام جنيه ! و بعدها دفعت اجره المواصلات , قبلها كنت فى الإستراحه فى الطريق , اه اللى انت دفعت عليها تمن كوبايه القهوه و الجرنان اللى هتقراه رغم انك موش عاوزه اصلا و اللى اشتريته من بايع الجرايد اللى فى الإستراحه , و اخيرا لما وصلت قررت انك لازم تتغدى كويس النهارده علشان ميتينج مهم وراك فأكلت فى مطعم بيشتغل فيه احمد و مرقص و سمير و بيديره تامر ! بمبلغ تانى من المال , و دا كله حصل بعد ما كنت اخدت عربون شغل جديد , كنت رايح علشانه الميتينج المهم دا 🙂

شوف بقى .. اللى قصادك دا ميتفهمش الا بطريقه واحده بس ! ربنا اداك الشغل دا .. اه علشان رزقك .. بس علشان رزق كل واحد طلع ليه و لو مليم واحد من ارباحك دى ! كل انسان انت لا تعرفه ولا شوفته قبل كده , كان ربنا سايبله رزقه معاك ! إنت مجرد ديلر ! و المال ملك لله 🙂

ربنا كريم .. كريم جدا .. بس رزقك اللى ممكن تبقى شايف نفسك بيه على الناس دا , هو فى الحقيقه ممكن يبقى موش علشان شخصك ! اللى ممكن يبقى احقر من اى حاجه فى الدنيا , ويبقى ربنا موسعلك فى رزقك … هو فى الحقيقه ممكن انت تكون بس بوابه .. او موش ممكن ! لا .. فى كله الاحوال انت بوابه لأرزاق ناس تانيه .. زى ما ناس تالته بوابه لرزقك انت شخصيا ..

فياريت متقرفش البشريه بالانا العليا عند حضرتك .. و تفتكر انك مجرد حته بتاعه على الكوكب 🙂

٤. أقسم بالله هتموت 🙂 :

هارون الرشيد مات .. فرعون مات ! سيدنا محمد “صلى الله عليه وسلم” برده مات ! أبو جهل مات ! ستيف جوبز مات ! سمعت عن حد اتولد علشان اى سبب غير انه هيموت ؟؟

حياتك كلها ماهى الا عباره عن ساعه رمليه , فى اللحظه اللى انت فيها دى .. اسأل نفسك .. انت عايش قد ايه ؟؟ بقالك كام سنه على سطح الكوكب الجميل بتاعنا دا ؟؟ طيب تفتكر ان الوقت عدى بسرعه قد ايه ؟؟

سواء كنت هتموت فى عز شبابك ! او كنت من اللى هيقعدوا يشربوا كوبايه قهوه و هو عنده ٦٠ ولا ٧٠ سنه فى شباك بيته بعد ما اتم رسالته فى الحياة على أتم وجه .. انت تقبل انك تموت من غير ما تسيب أثر ؟؟ طيب هتقبل انك ببساطه تعيش ساعه و تتعذب للابد !!!!!

شوف الموضوع ببساطه , انا عاوز بعد ما اموت تكون سيرتى كويسه و تكون عملت حاجه مفيده للبشريه , مهما كانت صغيره .. دا هدف لازم تشتغله من اللحظه الاولى لإدراكك للفكره دى نفسها ! سواء أتميتها أو لا .. بس حاول بشرف.

تانى حاجه “وانا موش شيخ و الله , بالعكس” , بلاش تدخل فى تجاره خسارنه ! الحياه كبرت او صغرت فهى صغيره , واصغر مما تتخيل .. اعمل حاجه لاخرتك.

٥. كلنا فاسدون .. لا استثنى منا أحد :

فى النقطه دى انا موش هتكلم كتير . بس بص لحياتك .. و حاول تشوف مدى الفساد اللى فيها .. الفساد له مليون شكل .. و عقلك ممكن يصورلك إنك مثالى ب تسعين مليون شكل ! حاول توصل لحقيقه كافه الامور فى حياتك .. وقتها هتقدر تحكم او على الاقل تتواصل مع اللى قدامك .. كل منا له زلاته 🙂 و كلنا بشر 🙂

٦. و تبقى السيرة الطيبة :

فى اسرتك . فى كام شخص ماتوا مميزين جدا .. اه انا عارف ان والدك حكالك اساطير جد من جدودك ! كان راجل محترم , و عمل و عمل و عمل , و عرف يعمل حاجه تخلى سيرته موجوده للحظه اللى احنا فيها دى !

موش لازم يكون سوبر مان يعنى ! ببساطه ممكن يكون جدك خد قرار انه ينتقل للمعيشه فى مكان ما . اللى انت دلوقتى اتولدت فيه .. و اللى لقيت فيه الحمد لله شغلك !!

حاول تعمل حاجه تتشكر عليها بعد موتك 🙂 جميله اوى ليك دى , بالدنيا و ما فيها.

٧. لله , موش للبشر :

كل اللى عند اى بشر فانى .. هيفنى بإن البشر دا نفسه يتغير , يموت ! موش مهم .. فى الاخر هيفنى .. خلى اى حاجه انت بتعملها , حتى لو اتقان شغل ليك , لله , موش للبشر , ولا لاى مصلحه منهم. اعمل اللى تتسأل عنه تجاوب من غير خوف.

 

اخيرا , كل اللى فوق , بديهيات , ممكن تفهمها من نفسك النهارده ! ممكن بكره , ممكن بعد سنين .. بس كل ما فهمتها أسرع .. كل ما سهلت عليك الحياة أكتر وأكتر ..

اتمنى تكونوا استفدوا و لو حاجه بسيطه 🙂

دمتم سالمين.

المناقشة و النشر