تجارب و مقالات

أنت مبدّع ؟ لك فقط أبل ..

   -   651

السلام عليكم , إن شاء الله تكونوا دايما بخير 🙂

النهارده إن شاء الله هنتكلم عن تجربه اجهزه أبل المختلفه .. على الاقل اللى اشتغلت بيها و جربتها.

طبعا موش هنقارن اى جهاز ابل , بجهاز PC عادى , حتى لو جهاز PC فضائى لان المقارنه ظالمه جدا لابل . موش لاى سبب الا انه ببساطه انتقاص منها , ودا ميرضيش حد دا 😀

إشمعنا أبل يعنى !؟

علشان الناس دى عاملين لوجو نضيف اوى 😀 .. هو موش كده طبعا. بس الموضوع ببساطه. انك بتتعامل مع جهاز او منتج متقن من كافه النواحى , اداء ثابت جدا , و يكاد يكون ضعف اى اداء او اكتر , مقارنه باى PC بنفس الامكانيات. و فى الحقيقه. فى بعض الامكانيات لو اتقالت ليك هتقول لا , دا جهاز ضعيف جدا ! حسب تجربتك مع ال PC لكن فى ماك بيكون اداءه خرافى! دا بالنسبه للجهاز او الهاردوير نفسه.

بالنسبه للسوفت وير. انت بكل بساطه بعيد عن كل الهرى اللى شائت الاقدار انه يكون موجود فى ويندوز. فى الحقيقه. البعد عن ويندوز غنيمه ! هتعرف قيمتها بعدين. فى ماك بصراحه فى البدايه كان الموضوع متخبط شويه. انا بدور على winamp ! او AMP Player ! تخيل ؟؟ اصلى موش عارف ايتونز دا بيتعاملو معاه ازاى !!!! تخيل ان دا اول انطباع ؟؟ امال فى الباقى هعمل ايه 😀

اسبوع واحد بعد امتلاكى لاول لابتوب ماك بوك برو , و مكونتش اقدر اقعد استخدم PC لاكتر من نص ساعه , ودا ابقى جيت على نفسى جدا جدا جدا و موش طايق نفسى ولا اى حد على وجه الكوكب بعد التجربه الصغيره فى الوقت دى.

فى الحقيقه السيستم رائع جدا. شئ كله متناسق , مفهوم, بسيط , مفيهوش هرى اطلاقا , و فيه اللى انت فعلا محتاجه . و له قاعده برامج مهوله . دعم اسطورى. من ناحيه الفيروسات “لو إنها نقطه موش اوى يعنى , و فيها كلام” لكن انت بعيد بشكل كبير عن الفيروسات و جنان ويندوز.

افكار مغلوطة !!

فى افكار كتير مغلوطه عند ناس كتير , كنت انا منهم. زى ان الاجهزه ملهاش برامج كتير , برامج ويندوز موش هتشتغل , السعر مبالغ فيه ! السيستم موش كويس .. و افكار كتير بتظهر بالشكل دا ..

الاول بالنسبه للبرامج ..

فى الحقيقه انت اصلا موش هتفكر فى برامج ويندوز. هتلاحظ فرق البرامج من هنا ل هنا .. فرق السما للارض. بإختصار . انت فى ويندوز بتتعامل مع مجموعه برامج ملهومش مكان غير سله المهملات. ع الاقل من ناحيه الاداء. ودا سهل جدا يتلاحظ. و موضوع ان البرامج قليله. دى كلمه غلط فى حق معرفتك , + بالنسبه للناس اللى موش بتحب تشترى برامج , فى كميه مواقع بتنزل كل برامج ابل اللى على الاستور فرى مفيش مجال اننا نتكلم عنها 😀 ,,,

ثانيا , من ناحيه السعر

بص لأبل ك خامات و طريقه انتاج. و تعالى نعمل مقارنه بسيطه جدا. هنقارن ال MacBook Pro الإصدار ال 15 ال Ratina . بحاجه زى Razer Blade Pro الجديد. علما ان شاشة ماك افضل بكتير جدا.

حد هيقولى اشمعنا الجهاز دا. ببساطه هو اقرب جهاز من ناحيه الماتريالز , و الامكانيات , و التصميم. واخر عنصر دا هو اهمهم بجوار الامكانيات. نفس جيل البروسيسور , نفس اداء كارت الشاشه .. نفس كل حاجه تقريبا. زود عليهم التراك باد الجديده الخاصه بأبل . و كذلك الكى بورد + الشاشه الراتينا و دى لوحدها حاجه تانيه خالص. و فى ابل مفيش شاشه فى الكى بورد. سعر ماك بوك تقريبا ٢٥٠٠ دولر. سعر ال Razer بإمكانيات اقل من ناحيه الهارد ديسك و البروسيسور كان ٢٣٠٠ دولر ! لو زودت بحيث تبقى نفس امكانيات الماك بوك , هيعدى ال ٢٦٠٠ .. و بحبه كويسين كمان ..

موش معنى ان شركه بتوفر فى الانتاج و تخلى المنتج رخيص , ان اسعار ابل مبالغ فيها.

إزاى اختار جهازى من أبل ؟

الاول قسم الاجهزه فى ابل لاجهزه بزنس و اجهزه ديزينرز .. النوع الاول ينفع جدا لديفلوبر , ينفع لمحررين , و ينفع للناس اللى شغلهم بشكل عام موش بيتطلب برامج تقيله على الجهاز. اما القسم التانى فهو خاص بإنك عاوز جهاز فعليا يستحمل.

أجهزه البزنس :

الاول دا موش تصنيف معترف بيه يعنى , بس هقسملك الاجهزه حسب الامكانيات علشان متوهش وسط الاجهزه. اللى تقدر تعتبره بزنس :

  1. Mac Book Air
  2. Mac Book Pro 13 inch
  3. Mac book
  4. Mac Mini – فى بعض الاوقات ينفع لديزنرز برده.
  5. iMac – 21 inch – فى بعض انواعه فقط تقدر تقول عليها انها بيزنس.

الاجهزه دى تستحمل معاك الشغل العادى. يعنى ممكن اه تفتح فوتوشوب و تشتغل. بس موش هيستحمل معاك اوى. لكن من ناحيه الحجم , الامكانيات , الوزن , الخامات , إلخ .. هو مناسب ليك جدا جدا.

شخصيا , بفكر اجيب حاجه منهم لمجرد التنقل بيها , تكون معايا بره البيت بس لو عاوز اتابع شغل , او اشتغل حجات بسيطه.

أجهزة الديزين :

دى بقى مجموعه أجهزه تستحمل معاك اى حاجه انت عاوز تعملها. لك حريه تخيل انك فى بعض الاجهزه تقدر توصل لانك تفتح اكتر من ٣٠ برنامج منهم اتقل برامج انت تعرفها و الجهاز ميهنجش ..

  1. MacBook Pro 15
  2. iMac
  3. MacPro

عن تجربه شخصيه . الاجهزه دى ادئها جبار. عن نفسى , بعشق ال iMac بكل انواعه , خصوصا اخر إصدارين , ال 5k و اللى قبله. شئ رائع جدا. الاجهزه دى انصحك بيها بشده كمان لو ناوى تدخل وسط اجهزه ابل.

طبعا وانت بتختار. فى من كل فئه كذا نوع , و امكانيات مختلفه. حاول تختار الوسط لو قلقان على الماديات. اما لو لا. فجيب حاجه عاليه افضل .. كمان لاحظ ان الرام فى ال MacBook Pro الجديد .. موش بيتغير و مينفعش ترقيه زى ما كنا بنعمل فى الاجهزه القديمه. الرام هنا جزء من البورد نفسها.

حاجه اخيرة :

كل الكلام اللى فوق. هو من خلال تجربتى مع أبل. من حوالى ٣ سنين و شويه. جربت خلالهم الاجهزة دى :

  1. MacBook Pro 15 Ratina
  2. MacBook Pro 13
  3. MacBook Air
  4. MacBook Pro 17inch – 2011
  5. iMac – 27 inch
  6. iMac 5k

منهم اللى جربته لفتره صغيره , يوم , يومين .. و منهم اللى كان شخصى او فى الشغل.

 

اخيرا اتمنى انكم تكونوا استفدوا.

دمتم سالمين 🙂

المناقشة و النشر